Нягледзячы на капрызы надвор’я, неабыякавыя грамадзяне працавалі на карысць сваёй малой радзімы.
У акцыі прыняло ўдзел амаль 14000 чалавек, на дадзены час сабрана 49000 рублёў. Гэта сведчыць аб высокай грамадзянскай адказнасці і жаданні бачыць свой раён чыстым і дагледжаным. Варта адзначыць, што да ўборкі далучыліся не толькі калектывы прадпрыемстваў і ўстаноў, але і многія жыхары, наводзячы парадак на прысядзібных участках.
Як падкрэсліў начальнік аддзела жыллёва-камунальнай гаспадаркі райвыканкама Аляксандр Бушук, усе сабраныя сродкі будуць накіраваны на далейшы росквіт Пружаншчыны.
— Гэта працяг слаўнай традыцыі, бо, дзякуючы сродкам папярэдняга вясновага суботніка, мы ўжо змаглі ўдыхнуць новае жыццё ў наш раён, рэалізаваўшы больш за дзесяць значных праектаў. Напрыклад, добраўпарадкавалі сквер імя Гудзімава, беражліва адрамантавалі брацкую магілу ў вёсцы Куляны, правялі бягучы рамонт помніка «Спаленым вёскам», захоўваючы памяць пра герояў. Таксама былі створаны новыя тратуарныя дарожкі і добраўпарадкаваны аўтастаянкі для зручнасці грамадзян. Так і цяпер, усе сабраныя грошы будуць выкарыстаны для далейшага развіцця і паляпшэння інфраструктуры Пружанскага раёна.
Акрамя фінансавых укладанняў, была праведзена каласальная работа па навядзенні парадку на месцах. Працоўныя калектывы арганізацый і прадпрыемстваў раёна, члены грамадскіх аб‘яднанняў на добраахвотнай аснове актыўна ўдзельнічалі ў добраўпарадкаванні і прывядзенні ў належны стан аб’ектаў і тэрыторый населеных пунктаў. Асаблівая ўвага была нададзена захаванню гістарычнай памяці: з трапятаннем і стараннасцю прыводзіліся ў парадак шматлікія помнікі, брацкія магілы, пахаванні. Таксама было праведзена зялёнае абнаўленне вуліц і паркаў праз масавую пасадку дрэў. Ажыццёўлена маштабная ачыстка тэрыторый ад дзікарослага парасніку, кустоў і смецця. Ліквідаваны старыя пабудовы, а таксама вёўся догляд за вадаёмамі, дзе праводзіліся работы па выдаленні аварыйных дрэў і карчаванні пнёў. Завяршальным штрыхом стала дбайнае зграбанне апалага лісця, што надало ўсяму раёну ахайны і дагледжаны выгляд.
Запрашаем усіх неабыякавых жыхароў раёна далучыцца да месячніка па добраўпарадкаванні і навядзенні парадку на зямлі! Разам мы робім наш раён яшчэ лепшым і прыгажэйшым!
Крысціна Асіпчук
Фота Кацярыны МАСІК