На працягу многіх гадоў у Беларусі 15 сакавіка адзначаецца Дзень спажыўца. Як зазначае спецыяліст аддзела эканомікі райвыканкама І.У.Шука, якая курыруе вырашэнне адпаведных пытанняў у раёне, яго нельга назваць святам. Хутчэй гэта яшчэ адна падстава, каб звярнуць увагу жыхароў рэспублікі на неабходнасць выканання ўсіх рэкамендацый і павышаць сваю фінансавую адукаванасць.
— І пэўныя вынікі можна зазначыць на падставе статыстыкі мінулага года,— адзначае Інэса Уладзіміраўна.— Напрыклад, значна скарацілася колькасць зваротаў з просьбай аб дапамозе па абароне правоў спажыўцоў. Акрамя таго, намі аказваецца толькі кансультацыйная падтрымка, а вырашэнне пытанняў адбываецца па добраахвотным пагадненні абодвух бакоў, без зваротаў у суд. Даступнасць інфармацыі ў СМІ, інтэрнэце прыводзіць да таго, што дапамога ў абароне правоў спажыўцоў патрабуецца толькі больш сталым грамадзянам.
Як правіла, большасць спрэчак вырашаюцца на карысць спажыўцоў. Па-ранейшаму пераважная колькасць праблемных пытанняў тычыцца якасці прадукцыі. І ў гэтым лягчэй за ўсё знаходзіцца кансенсус у дачыненні прадукцыі менавіта айчынных вытворцаў, якія больш пільна ставяцца да свайго аўтарытэту: здараліся выпадкі, калі прадпрыемствы ішлі на правядзенне рамонтных мерапрыемстваў у рамках гарантыйных абавязацельстваў нават такіх паломак, якія адбыліся па віне саміх уладальнікаў.
Акрамя якасці прадукцыі, часта спажыўцы скардзяцца на сэрвіс. У асноўным скаргі тычацца якасці вырабу пластыкавых вокнаў і адпаведнасць іх мантажу. Пасля аказання кансультацыйнай дапамогі і правільна складзеных прэтэнзій, усе падобныя звароты былі задаволены на карысць спажыўцоў.
Між тым, па словах І.У.Шукі, апошнім часам тэматыка зваротаў мяняецца. Па-першае, павялічваецца колькасць скарг на якасць камп’ютарнай тэхнікі. Прычым набытай не толькі ў раёне, але і праз глабальную сетку інтэрнэта. Дарэчы, апошні метад набыцця тавараў пакуль застаецца самым рызыкоўным, хаця і прыцягвае больш нізкімі коштамі. Гэта тычыцца не толькі камп’ютараў і розных электронных гаджэтаў, але і друкаванай прадукцыі.
Ёсць і такія сітуацыі, калі грамадзяне палічылі сябе «ахвярамі» рознага кшталту прэзентацый на даму. Такія мерапрыемствы звычайна ладзяцца заезджымі камерсантамі, якія збіраюць гледачоў на якой-небудзь кватэры і дэманструюць касметыку або посуд. Потым бывае складана адшукаць такога прадаўца, каб выставіць да яго прэтэнзіі.
У святле апошніх новаўвядзенняў, якія тычацца ўкаранення рэгламентаў Мытнага саюза, Інэса Уладзіміраўна звяртае асаблівую ўвагу спажыўцоў і індывідуальных прадпрымальнікаў на выкананне законных патрабаванняў. Напрыклад, зараз ідзе пераходны перыяд, падчас якога рэалізатары павінны, пры адсутнасці сертыфікатаў адпаведнасці, выдаваць пакупнікам прадукцыі лёгкай прамысловасці абавязацельствы ўстаноўленага ўзору.
Алег СІДАРЭНКА.