Да новага навучальнага года засталося крыху менш за два тыдні. Па традыцыі магазін «Дзіцячы свет» падрыхтаваў паказ школьнага адзення дзелавога стылю. Ацаніць модныя вобразы ад лепшых беларускіх вытворцаў, падабраць ідэальны ўбор да 1 верасня, што пры гэтым улічваць і на якія прадметы адзення звяртаць увагу — на модным дэфіле прапанавалі не толькі школьнікам і бацькам, але і настаўнікам.
Выбар школьнай формы — няпростая задача. Сёння да камплекта школьнага адзення прад’яўлены пэўныя патрабаванні. Ён павінен быць шматфункцыянальным, гігіенічным, зручным і адпавядаць сучаснай модзе.
З клопатам пра камфорт юных беларусаў прадпрыемствы лёгкай прамысловасці распрацавалі калекцыю адзення на 2025-2026 год. На паказе было прадстаўлена адзенне для дзяўчынак дзелавога стылю швейных фабрык «Калінка», «Эліз», «Надэкс», «Славянка», «Жлобінская швейная фабрыка». Асобным пунктам у паказе былі адзначаны калекцыі ад «МаркФармэль» і «Ніна Стыль». Менавіта гэтым брэндам надавалася асаблівая ўвага.
Школьнае адзенне ўключае сукенкі, спадніцы, жакеты, джэмперы, вадалазкі, штаны, сарафаны для дзяўчынак у цёмна-сінім колеры, сарочка і джэмпер «з ілжывым каўнерыкам» для хлопчыкаў.
Адзенне школьнай калекцыі зроблена з лёгкай і прыемнай навобмацак віскозы, а таксама натуральнай бавоўны. У склад палотнаў дабаўлены поліэстэр і эластан, якія павялічваюць трываласць і зносаўстойлівасць матэрыялаў.
Калі бацькі не могуць вырашыць, якую школьную форму купіць дзяўчынцы, варта звярнуць увагу на сарафан. Такія мадэлі зручныя, камфортныя і ўніверсальныя. Яны ідэальна падыдуць для вучаніц малодшых класаў, а таксама для выпускнікоў. Да таго ж, з дапамогай усяго аднаго сарафана можна ствараць дзясяткі розных вобразаў. Для гэтага дастаткова толькі назапасіцца блузкамі, кашулямі, вадалазкамі і футболкамі з доўгім рукавом, якія можна апранаць пад сарафан. Для вучаніц малодшай школы лепш за ўсё выбраць мадэль сарафана, які мае прамы крой або трапецападобную спадніцу.
Пры выбары школьнай формы не варта забываць і пра школьныя штаны. Гэта абавязковы атрыбут формы, які забяспечыць дзіця камфортам і ўтульнасцю ў любую пару года. Зімой ці позняй восенню ў штанах дзяўчынка будзе адчуваць сябе намнога камфортней, чым у спадніцы. Да таго ж, рэкамендуецца выбіраць мадэлі, якія выраблены з бавоўны і іншых натуральных матэрыялаў. У такім выпадку ніколі не будзе холадна.
Для стварэння дзелавога стылю ў гардэробе настаўнікаў былі прадстаўлены пінжакі, спадніцы, злёгку завужаныя ўкарочаныя штаны, кашулі, сукенкі, лодачкі на абцасе і лоферы. Гэта дзелавыя мадэлі прадпрыемстваў «Калінка» і «Стыльная лэдзі» г. Гродна. Калекцыя выглядае выразна і цікава, заварожваючы абсалютнай прадуманасцю і функцыянальнасцю. У дадзеных камплектах дызайнеры захавалі прамыя лініі крою, сіметрыю, пры гэтым выкарыстаны толькі натуральныя тканіны.
Таксама на паказе было прадстаўлена спартыўнае адзенне вядомых пастаўшчыкоў: «Бабруйск-трыкатаж», «Светлатэкс».
Прадукцыя ААТ «Бабруйсктрыкатаж» валодае добрай формаўстойлівасцю, адварот з натуральнай бавоўны забяспечвае добры паветраабмен і гіграскапічнасць. Вырабы добра трымаюць колер, валодаюць высокай зносаўстойлівасцю, палатно не выціраецца, мае добрыя паказчыкі да мокрых апрацовак.
Нанясенне прынтаў з новымі эфектамі: 3D пасты, пасты са срэбрам, эластычныя пасты, друк глітэрам надае вырабам сучасны стыль і крэатыўнасць.
Нядзельны шопінг стаў удвая прыемней, дзякуючы дэгустацыі прадукцыі Пружанскага малочнага камбіната. Любімыя прысмакі вучняў змаглі ацаніць і іх бацькі, а таксама выбраць лепшае да школьных сняданкаў і перакусаў.
Усе калекцыі адзення, прадстаўленыя на модным паказе, можна і зараз набыць у «Дзіцячым свеце», у аддзеле «Гатовае адзенне», па вул. Савецкай, 11.
Ірына Велясевіч. Фота аўтара