11 мая 2025 года аграгарадок Шані стаў цэнтрам прыцягнення для жыхароў і гасцей раёна, якія сабраліся на маштабным святкаванні 80-годдзя Вялікай Перамогі і Дня ваенна-патрыятычнага выхавання. Арганізаванае ААТ «Шані-аграпрадукт» мерапрыемства стала яркай і запамінальнай падзеяй, якая аб’яднала розныя пакаленні.
З самай раніцы на тэрыторыі аграгарадка панавала атмасфера свята. Асаблівую цікавасць у юных гасцей выклікала выстава ўзораў сучаснай ваеннай і сельскагаспадарчай тэхнікі. Дзеці з задавальненнем вывучалі прадстаўленыя экспанаты, імкнуліся не толькі разглядзець іх зблізку, але і дакрануцца да гісторыі. Самыя смелыя ўзбіраліся на тэхніку, каб адчуць сябе сапраўднымі героямі і зрабіць яркія памятныя фатаграфіі. У праграму свята ўвайшло і відовішчнае выступленне кінолага з верным чатырохногім памочнікам. Спрытны і разумны пёс прадэманстраваў свае навыкі, выклікаўшы захапленне ў гледачоў усіх узростаў. Асаблівай папулярнасцю карысталася стралковая трэніроўка, дзе кожны жадаючы мог праверыць сваю меткасць.
Музычным падарункам для ўсіх прысутных стала выступленне ваеннага аркестра з Брэста, які выканаў вядомыя песні ваенных гадоў. Захапляльным было выступленне Пружанскага Палаца культуры: кранальны нумар з удзелам дзяцей нікога не пакінуў абыякавым. Пранізлівае выкананне песень ваенных гадоў і пранікнёная харэаграфія прымусілі гледачоў праслязіцца. Традыцыйная салдацкая каша і гарачы чай сталі выдатным дапаўненнем святочнай атмасферы. Для самых маленькіх гасцей арганізавалі атракцыёны і шоу мыльных бурбалак, якія выклікалі шквал захаплення і смеху. А кульмінацыяй свята стаў доўгачаканы розыгрыш латарэі, арганізаванай ААТ «Шані-аграпрадукт»! І фартуна сапраўды ўсміхнулася гасцям. Акрамя пральнай машыны, сучаснага тэлевізара і мікрахвалевай печы, шчасліўчыкі выйгралі жывога парсючка і нават білеты на круты рок-фестываль «Сонцастаянне-2025» у Пружанах і шмат іншых каштоўных падарункаў! Радасць пераможцаў складана перадаць словамі, іх твары свяціліся ад захаплення і падзякі!
Свята ў аграгарадку Шані стала не толькі данінай памяці героям, але і паказала хараство нашага жыцця. Няхай над зямлёй заўсёды будзе мірнае неба, а шчодрасць і дабрыня спадарожнічаюць усім нашым справам.
Крысціна Асіпчук
Фота аўтара