15 студзеня 2025 года Пружанскаму раёну споўнілася 85 гадоў. За мінулы час на пружанскай зямлі адбылося нямала падзей, якія істотна змянілі аблічча рэгіёна, жыццё людзей. Працягваем успамінаць самыя значныя з іх.
Неаднойчы, вывучаючы гісторыю Пружанскага раёна, прыходзіў да высновы, што ўмоўна яе можна падзяліць на два перыяды — да і пасля «Дажынак». Магчыма, нехта са мной і не пагодзіцца, але лічу, што рэспубліканскі фестываль-кірмаш, які прайшоў у Пружанах у 2003 годзе, неверагодна паўплываў на развіццё нашага рэгіёна. І праяўляецца гэты ўплыў не толькі ў знешніх змяненнях. З глабальным абнаўленнем горада і шэрага тэрыторый раёна мы зразумелі, што можна жыць інакш. Прыйшло адчуванне, што Беларусь стала сапраўднай «дзяржавай для народа». Не ўяўнай, а рэальнай. Што абяцанні ўлады павінны здзяйсняцца, плануемае ажыццяўляцца. А яшчэ мы зразумелі, што вяртання да той «бездані», якую давялося перажыць — ужо не будзе.
2000-2005 гады:
69 факт. Зноў з’яўляюцца навіны са словамі «адкрыўся», «створаны», «здадзены ў эксплуатацыю» і т. п. Пералічваць аб’екты доўга: бібліятэкі, магазіны, аўтазапраўкі… пераважная большасць новаўвядзенняў у райцэнтры, але і ў вясковай мясцовасці з’яўляліся цэлыя прадпрыемствы — «Уніформа», «Экалагічныя матэрыялы», «Адоб-Агра», «Бударама» і іншыя.
70 факт. Мы ўспомнілі, што жыццё складаецца не толькі з імкнення выжыць, але і пакінуць пасля сябе нешта каштоўнае. У прыватнасці, памяць пра гераізм нашага народа ў сумную часіну. 15 лютага 2002 года быў урачыста адкрыты помнік воінам-інтэрнацыяналістам і нашым землякам, якія загінулі, выконваючы вайсковы абавязак у Афганістане. 15 кастрычніка 2005 года — помнік «Спаленым вёскам», а ў наступным месяцы — абеліск на яўрэйскіх могілках па вул. Г.-Каляды. А яшчэ з 2005 года аднавіліся пошукавыя работы на невядомых пахаваннях часоў Вялікай Айчыннай вайны з перанясеннем знойдзеных астанкаў на вайсковыя могілкі ў в. Слабудка. Будзем памятаць мы — не забудуць і нашчадкі.
71 факт. Адбываюцца істотныя, нават эпахальныя пераўтварэнні ў сельскай мясцовасці Пружаншчыны. Па-першае, калгасы пераўтвараюцца ў акцыянерныя таварыствы, перавагу ад чаго яшчэ трэба адчуць. Па-другое, у рамках рэалізацыі Дзяржпраграмы вёскі, дзе размяшчаліся цэнтральныя сядзібы гаспадарак, было вырашана перайменаваць у агра-гарадкі.
72 факт. У 2005 годзе Пружанскі раён быў прызнаны адным з лепшых у рэспубліцы па колькасці пабудаваных на сяле жылых дамоў у рамках Прэзідэнцкай праграмы абнаўлення вёскі (150 у 2004 годзе).