Сельгаставарыства «Ліноўскае» не самае буйное па зямельных плошчах у раёне. Але гэта не значыць, што праблем і задач у яго становіцца менш. Таму кожны дзень тут стараюцца праводзіць аптымальна, не пакідаючы па-за ўвагай ніводзін накірунак дзейнасці. Разам з тым, будуюць планы на будучыню, без якіх немагчыма далейшае станоўчае развіццё таварыства.
Для кожнай гаспадаркі важным фактарам у павышэнні якасці выпускаемай прадукцыі з’яўляецца абнаўленне машынна-трактарнага парка. Зразумела, што гэтае пытанне ні адно сельгаставарыства раёна вырашыць адразу не можа. Таму закупка тэхнікі і агрэгатаў праводзіцца паступова, звяртаецца ўвага на значнасць прымянення ў рабоце.
Дырэктар ААТ «Ліноўскае» Васілій Казмярчук у гэтым плане перавагу аддае трактарнаму парку, разумеючы, што менавіта гэтая тэхніка ў выніку спрацуе на прыбытак гаспадаркі. Скарыстаўшыся тым, што Прэзідэнт краіны Аляксандр Лукашэнка даў даручэнне райаграсэрвісам рэспублікі аказаць бязвыплатную дапамогу сельскагаспадарчым таварыствам, Васілій Васільевіч звярнуўся ў КУВП «Бярозарайаграсэрвіс» з просьбай аб пераабсталяванні трактара «Беларус 3022». І вось сёлета за бюджэтныя грошы заменены рухавік (устаноўлены ад «МАЗа»), і тэхніка працягвае працаваць на карысць гаспадаркі.
З выкарыстаннем прамагралізінгу ў ААТ «Гомсельмаш» набыты кормаўборачны камбайн «КВК-800» з усім навясным абсталяваннем, што дасць магчымасць у больш кароткія тэрміны праводзіць уборку і закладку кармоў.
Па гэтай жа праграме куплены энерганасычаны трактар «Беларус 3522», які адразу прыступіў да работы. Новую тэхніку даручылі вопытнаму механізатару Васілію Яроцкаму. І цяпер трактар разам з сеялкай «АППМ-6» задзейнічаны на сяўбе яравых. Падмога для таварыства значная, тым больш што тэхніка дазволіць правесці паскораную сяўбу. Дарэчы, сёлета ў гаспадарцы пад раннія яравыя адведзена 610 га.
Калі ўжо загаварылі пра сяўбу, то нельга не сказаць пра такі фронт работ, як падкормка азімых культур. Нездарма кажуць: што пасееш — тое і пажнеш. Догляд азімых павінен быць на самым высокім узроўні, бо гэта немалая частка будучага ўраджаю. Сельгаставарыства «Ліноўскае» ўжо правяло другую падкормку азімага рапсу на плошчы ў 300 га і азімых збожжавых на зерне на 1200 га. На палетку каля аг. Лінова з дапамогай сельгастэхнікі «Раса» гэтай работай займаўся механізатар Анатоль Хвядчэня. За дзень падкармлівалі 170-180 гектараў, для гэтага выкарыстоўваюцца вадкія мінеральныя ўгнаенні, якія ўносіліся і пад сяўбу яравых збожжавых.
І яшчэ дададзім, што зусім не важна, якія плошчы маеш у сваім распараджэнні. Галоўнае — гэта людзі, якія старанна працуюць, перажываюць за вынік, а значыць, усё ў нас атрымаецца.
Вадзім Раўнейка. Фота Кацярыны Масік