Безумоўна, да яго далучаецца і ўвесь калектыў Пружанскага КУВП «Камунальнік», які па колькасці работнікаў з’яўляецца адной з самых буйных арганізацый раёна. А па «зоне адказнасці» прадпрыемства — безумоўны лідар. Як зазначае яго дырэктар Сяргей Бабрук, практычна ўсе сферы нашай паўсядзённасці залежаць менавіта ад камунальшчыкаў. Дабрабыт, парадак, камфорт жыцця і нават забеспячэнне многімі неабходнымі для існавання рэчамі разам з паслугамі.
— Каб выконваць ускладзеныя на нас задачы, прадпрыемства ЖКГ мае патрэбнае аснашчэнне,— падкрэслівае Сяргей Васільевіч.— Больш за тое, штогод тэхнічна мы абнаўляемся, набываем машыны, абсталяванне і іншыя працоўныя прылады. Не буду пералічваць усе «абноўкі», што паступілі нам у 2025 годзе, адзначу толькі самыя буйныя. У прыватнасці, летась быў набыты новенькі самазвал «МАЗ», прычапная падмятальна-прыбіральная машына «Магістраль», дзве «ГАЗэлі», агрэгат для правядзення ямачнага рамонту «Бастыён» і 3 кампактныя смеццявозы зялёнага колеру, якія ўжо калясяць па населеных пунктах раёна. Усяго на абнаўленне было выдаткавана каля 2 мільёнаў рублёў.
Аднак не гэта самае галоўнае, а тое, што ўсё набытае ёсць каму даручыць. Пра рашучую сілу кадраў кожны з нас выдатна ведае, а знакаміты выраз чулі неаднойчы. Паўтараць яго можна і зараз, нават па некалькі разоў на дзень, таму што актуальнасці ён не губляе і сёння. Тым больш, для такога аб’ёму работ, які ўскладзены на «Камунальнік» з яго падраздзяленнямі, патрэбны адказныя і вопытныя работнікі, якімі мы таксама можам пахваліцца.
— А сам калектыў арганізацыі абнаўляецца?
— Так, і прыемна, што адбываецца паўнавартасны кадравы кругаварот, калі моладзь прыходзіць не ў «вакуум», а трапляе ў рукі вопытных работнікаў. І ў нас ёсць такія, хто адпрацаваў больш за 35 гадоў на прадпрыемстве. У іх ліку варта назваць начальніка аддзела Галіну Гардзей, тэхніка па ўліку Ларысу Мітлашук, слесара-рамонтніка Уладзіміра Віцько, вартаўніка Надзею Ляховіч, рабочую зялёнага будаўніцтва Вольгу Кандарэвіч, начальніка ўчастка Сяргея Грыбоўскага, вадзіцеляў Валерыя Мароза, Уладзіміра Тарасюка і Генадзя Парэмскага. А больш «малодшых» можна налічыць звыш сотні работнікаў. Словам, ёсць каму захоўваць традыцыі і перадаваць іх наступным камунальшчыкам.
— Сяргей Васільевіч, Ваша арганізацыя — лідар і па колькасці ведамаснай падпіскі на «Раённыя будні». Чаму вы выпісваеце столькі экзэмпляраў?
— Камунальшчыкам патрэбны позірк «збоку», каб ведаць, як чытацкая аўдыторыя «раёнкі» ацэньвае іх работу. А яшчэ даведвацца пра праблемныя месцы, таму і крытыка бывае карыснай. Вось для чаго мы і выпісваем «Раённыя будні» ў такой колькасці, каб актуальная інфармацыя была даступна для ўсіх работнікаў арганізацыі. Лічу, што гэта таксама паспрыяе павышэнню якасці работы службы ЖКГ.
Вось менавіта гэтага і хачу пажадаць усяму калектыву КУВП «Камунальнік» з нагоды надыходзячага свята. Хай хопіць сіл, здароўя, энергіі для выканання задач. І звяртаюся да ўсіх пружанцаў з просьбай: не шкадуйце лішні раз падзякаваць.
— Ад нашых чытачоў мы таксама віншуем кожнага камунальшчыка і выказваем шчырую ўдзячнасць за прыгажосць пружанскіх населеных пунктаў і ўтульнасць нашых дамоў.
Гутарыў Алег Сідарэнка
Фота аўтара і Кацярыны Масік