Міжведамасная спартландыя «Сяброўства і спорт: толькі наперад», прымеркаваная да Дня народнага адзінства, прайшла 17 верасня на пляцоўцы скейт-ролер-парка на гарадскім стадыёне «Мухавец».
Удзел у спаборніцтве бралі тры каманды: Пружанскі раённы цэнтр карэкцыйна-развіваючага навучання і рэабілітацыі, Антопальская школа-інтэрнат і дружына аддзялення рэабілітацыі, абілітацыі інвалідаў Пружанскага ТЦСАН.
Дадзеная падзея дазволіла яго ўдзельнікам праявіць сябе з найлепшага боку і паказаць свае індывідуальныя магчымасці і імкненне да фізічнага ўдасканалення.
Усім удзельнікам спаборніцтваў неабходна было паўдзельнічаць у 10 спартыўных конкурсах. Спартландыя была багатая на шматлікія конкурсы і спартыўныя выпрабаванні, паводле вынікаў якіх журы вызначыла пераможцу. Хоць галоўнай мэтай мерапрыемства была не перамога, а ўдзел, кожны імкнуўся да трыумфу, што рабіла спаборніцтвы па-сапраўднаму цікавымі і напружанымі.
Па выніках усіх конкурсаў каманды ДУА «Антопальская школа-інтэрнат» і дружына аддзялення рэабілітацыі, абілітацыі інвалідаў Пружанскага ТЦСАН набралі па 18 балаў і занялі 2-ое месца, а пераможцам спаборніцтваў сталі выхаванцы Пружанскага раённага цэнтра карэкцыйна-развіваючага навучання і рэабілітацыі са сваімі бацькамі, якія крыху апярэдзілі сваіх апанентаў.
Кожны калектыў быў удастоены дыплома ад аддзела па адукацыі райвыканкама, а ўсе ўдзельнікі падзеі атрымалі зарад бадзёрасці і станоўчай энергіі.
Руслан Басак. Фота Кацярыны Масік