Четверг, 13 февраля 2025

85 фактаў з жыцця раёна

439

15 студзеня 2025 года Пружанскаму раёну споўнілася 85 гадоў. За мінулы час на пружанскай зямлі адбылося нямала падзей, якія істотна змянілі аблічча рэгіёна, жыццё людзей. Працягваем успамінаць самыя значныя з іх.

Мінула ўсяго 5 гадоў з тых «чорных» дзён сярэдзіны 90-х. Нават у жыцці чалавека такі тэрмін з’яўляецца нязначным, не гаворачы ўжо ў маштабе краіны. Між тым, і за гэты кароткі перыяд адбыліся вельмі маштабныя змены. Кардынальныя і, галоўнае, да лепшага.

1995-2000 гады:
65 факт. Аднаўляецца прамысловасць і сельская гаспадарка раёна. У прыватнасці, 9 з 13 прадпрыемстваў выйшлі на ўзровень паказчыкаў за 1990 год. Паступова справы наладжваюцца і ў сельскай гаспадарцы, хоць там было яшчэ далёка да аднаўлення. Сярэднія надоі — 4500 кг малака ад каровы за год, ураджайнасць збожжавых — 22 ц/га, бульбы — 168 ц/га, цукровых буракоў — 223 ц/га. Аднак, як бачым сёння, АПК Пружаншчыны толькі пачаў «разгон».

66 факт. З новага стагоддзя пачынаецца духоўнае адраджэнне пружанскага краю. З 2000-га года сталі аднаўляць былыя і будаваць новыя храмы. І «першай ластаўкай» у гэты год стала адрэстаўраваная Свята-Петрапаўлаўская царква ў в. Мокрае.

67 факт. Апошні год 20 стагоддзя (або першы 21-га, як паглядзець) вызначыўся стварэннем многіх карысных творчых ці грамадскіх аб’яднанняў, а таксама адкрыццём аб’ектаў з розных галін эканомікі і сацыяльна-культурнага жыцця рэгіёна. Напрыклад, у 1996 годзе быў створаны маладзёжны атрад дружыннікаў «Беркут», выхаванцы якога і зараз служаць у праваахоўных органах, на граніцы Беларусі і іншых сілавых падраздзяленнях краіны. Таксама адбылося першае выступленне ансамбля танца «Ойра» (2000). Пасля працяглай рэстаўрацыі адчыніў свае дзверы музей-сядзіба «Пружанскі палацык». А ў прыхільнікаў футбола з’явілася магчымасць пабалець за сваіх — ФК «Пружаны».

68 факт. У 1999 годзе Пружанам быў вернуты старажытны герб, які і зараз адлюстраваны на сцягу нашага райцэнтра.