15 студзеня 2025 года Пружанскаму раёну споўнілася 85 гадоў.
За мінулы час на пружанскай зямлі адбылося нямала падзей, якія істотна змянілі аблічча рэгіёна, жыццё людзей. Працягваем успамінаць самыя значныя з іх.
Усё часцей гучаць меркаванні адносна таго, што «перабудова ідзе складана». Амаль штогод адзначаецца недахоп па многіх накірунках: будаўнічых матэрыялаў, паліва, тавараў народнага спажывання. Нават на друк раённай газеты былі ўведзены «папяровыя ліміты». Да 1990 года ўзмацніліся заклікі «за абнаўленне», рэзультатаў якога ў той перыяд пружанцы яшчэ не ведалі…
1985-1990 гады:
55 факт. Задумана газіфікацыя райцэнтра: з боку вёскі Шані да Пружан набліжалася нітка з прыродным газам. Але гэта не ўсе дасягненні ў абнаўленні выгляду раёна. У гэты ж перыяд пачалося ўзвядзенне раённага Дома культуры (яно цягнулася да 2003 года) і СШ №5. А таксама адкрыўся піянерскі лагер «Дубок». Нарэшце з’явілася ўласная стаматалагічная паліклініка. А ў Ружанах, Шарашэве, Лыскаве, Клепачах, Лінове і Сухопалі адкрыты калгасныя рынкі. Адзначаны «папаўненні» і ў сферы культуры: першы канцэрт даў гурт «Бабіна лета» (1989) і пачало прымаць навучэнцаў харэаграфічнае аддзяленне (1986) Пружанскай музычнай школы.
56 факт. У рамках ліквідацыі наступстваў аварыі на Чарнобыльскай АЭС арганізавана перасяленне людзей з забруджаных тэрыторый Гомельскай і Магілёўскай абласцей. Пружанскаму раёну пастаўлена задача прыняць і рассяліць 113 сем’яў. Найбольш актыўную дапамогу перасяленцам аказалі калгасы «60 год БССР», «Рассвет», «Дружба», імя Леніна, імя Калініна, «Шлях Леніна», «Іскра» і саўгас «Савецкі».
57 факт. У раёне створаны клуб даярак-чатырохтысячніц (старшыня — даярка саўгаса-тэхнікума Галіна Барсук). Спачатку ён аб’ядноўваў 14 чалавек, а ў 1990 годзе — 130. Напэўна, зараз варта было б арганізаваць клуб даярак-васьмітысячніц?
58 факт. Падрыхтавана да друку кніга «Памяць» Пружанскага раёна (выйшла ў свет у 1993 годзе), работа над падрыхтоўкай якой заняла амаль 3 гады.
59 факт. 1990 год стаў апошнім для раённай газеты пад назвай «Зара камунізму». Першы выпуск 1991 года выйшаў ужо як «Раённыя будні».