У чацвер у школьнікаў пачаўся новы навучальны год: сёлета ў 28 агульнаадукацыйных установах Пружаншчыны будуць атрымліваць веды звыш пяці тысяч хлопчыкаў і дзяўчынак. Старт Дню ведаў далі традыцыйныя ўрачыстыя лінейкі, якія прайшлі ва ўсіх школах краіны. Бадай, галоўным лейтматывам гучаўшых у гэты дзень прамоў была перакананасць, што Дзень ведаў — гэта асаблівы дзень у жыцці кожнага чалавека.
Святочную лінейку ў Шанях наведаў старшыня райвыканкама М.М.Крэйдзіч. Кожнаму класу кіраўнік раёна адрасаваў розныя пажаданні: першаклашкам — задвальнення ад вучэбнага працэсу, які яны толькі распачынаюць, вучням выпускных класаў — вызначыцца з выбарам прафесіі, што немалаважна ў дарослым жыцці, асатнім — быць стараннымі вучнямі, каб аказацца дастойнымі грамадзянамі сваёй краіны. Госць падарыў школьнікам камплект мячоў са спадзяваннем, што яны не толькі ў вучобе, але і ў спорце дасягнуць поспехаў.
Вынікі летняй дзейнасці дзяцей падагульніла дырэктар школы А.М.Ярмашэвіч. Алена Мікалаеўна адзначыла памятнымі падарункамі тых, хто вылучыўся падчас конкурсаў ці ў іншых школьных справах, выказала словы падзякі мясцоваму сельгаставарыству, якое дапамагло падрыхтавацца да чарговага навучальнага года. А самым маленькім школьнікам, для якіх званок у гэты дзень звінеў упершыню, уручыла кнігі «Беларусь — наша Радзіма» — падарунак ад Прэзідэнта краіны А.Р.Лукашэнкі.
Хочацца адзначыць, што госці лінейкі наведаліся сюды не толькі дзеля віншаванняў, але і каб адзначыць лепшых. Так, у прыватнасці, намеснік дырэктара па ідэалагічнай рабоце ААТ «Шані-аграпрадукт» Л.М.Раманава падзякавала школьнікам за летняе супрацоўніцтва і заахвоціла грашовымі прэміямі вучняў, якія дапамагалі гаспадарцы. Ад мясцовай бібліятэкі ўзнагароды атрымалі лепшыя чытачы.
Новае пакаленне вучняў на першы ў іх жыцці ўрок за руку адвялі адзінаццацікласнікі. Дарэчы, сёлета ў Шаняўской СШ імя Міколы Засіма да заняткаў прыступілі больш 80 чалавек. Восем хлопчыкаў і дзяўчынак упершыню селі за школьныя парты гэтай установы, а вось для дзевяці вучняў наступіўшы навучальны год будзе апошнім.
Навучальны год у шаняўскіх вучняў, як і ва ўсіх школах краіны, пачаўся з урока «Нам свет завешчана берагчы». Далей — урок бяспекі і некалькі заняткаў па раскладу. Увогуле, паводле інфармацыі Міністэрства адукацыі, з гэтага вучэбнага года ў адукацыйны працэс будуць паэтапна ўводзіцца вучэбныя праграмы, абноўленыя з улікам неабходнасці памяншэння аб’ёму тэарэтычнага матэрыялу і ўзмоцненай арыентацыі на практыку. Сёлета па такіх абноўленых праграмах пачнуць займацца вучні першых, другіх, пятых, шостых, дзясятых і адзінаццатых класаў.
Празвінеў першы званок і для вучняў СШ № 4 г.Пружаны. Тут было мора кветак і белых бантаў, і мора бацькоўскага хвалявання …
На прасторнай пляцоўцы ля параднага ўваходу ў гэты дзень на ўрачыстую лінейку выстраіліся крыху больш за 300 школьнікаў, але галоўнымі дзеючымі асобамі Дня ведаў былі першакласнікі – сёлета ў школу залічана 24. Учарашнія дашкольнікі выглядалі не па гадах сур’ёзна. І хоць дзяцінства для іх не канчаецца, паход у першы клас – гэта крок у дарослае жыццё.
– Жадаем упэўнена крочыць па Каралеўстве ведаў, дзе кіруе кароль-праца і каралева-цярпенне! Няхай кожны дзень усіх адзінаццаці школьных гадоў будзе напоўнены новымі адкрыццямі і радаснымі падзеямі! Наперадзе вас чакаюць новыя сябры і мноства прыемных незабыўных хвілін! – наказвалі ім першыя настаўнікі.
Не менш хвалюючая падзея і для 44 адзінаццацікласнікаў. Для іх – гэта апошні навучальны год у школе. Не хавалі слёз радасці іх бацькі: здаецца, яшчэ ўчора іх дзеці хаваліся за букетамі кветак, а сёння перад іх вачыма – прыгожыя юнакі і дзяўчаты.
Доўгачаканым было свята і для настаўнікаў. Менавіта для іх і былі прынесены кветкі, гучалі шчырыя словы ўдзячнасці.
Сёлета педагагічны калектыў папоўніўся трыма маладымі спецыялістамі. Пад кіраўніцтвам Дзмітрыя Анатольевіча Саўчука хлопцы будуць асвойваць станкі, лобзікі і рубанкі. З Аленай Уладзіміраўнай Субачовай школьнікі спазнаюць свет замежных моў, а генетычныя задачы будуць вырашаць з біёлагам Анастасіяй Ігараўнай Стасевіч…
З цёплым прывітальным словам да прысутных звярнуўся дырэктар школы Ю. А. Яльцоў:
— Дарагія вучні! Сёння ў вас пачынаецца новы навучальны год. Наперадзе вас чакае шмат адкрыццяў, новых ведаў і ўменняў. Упэўнены, што вы зможаце дамагчыся пастаўленай для сябе мэты, праўда, для гэтага вам і вашым бацькам спатрэбіцца шмат сіл і цярпення. А мы, настаўнікі, са свайго боку створым усе ўмовы, каб вы маглі праявіць сябе ў той сферы дзейнасці, да якой у вас ляжыць душа, і якая вызначыць вашу будучыню, – можна не сумнявацца, што словы Юрыя Андрэевіча не будуць разыходзіцца са справай. Як паказвае статыстыка, штогод выпускнікі яго школы паказваюць высокія вынікі ва ўступнай кампаніі, сёлета ў прэстыжныя ВНУ краіны паступіла 14 навучэнцаў — школа можа імі ганарыцца.
Трэба адзначыць, што цяпер у СШ № 4 выдзелена 5 профільных напрамкаў з ахопам філалагічных, матэматычных і біялагічных навук. А мяркуючы па тым падарунку, які ўручыў школе ганаровы госць – начальнік аддзела жыллёва-камунальнай гаспадаркі райвыканкама А.В.Бушук, самы час ствараць футбольную каманду: цэлая сетка футбольных мячоў ужо ёсць. Больш за ўсё ім узрадаваліся, вядома ж, першаклашкі.
Але ўсяму свой час. Перад тым, як празвінеў першы званок, старшакласнікі ўручылі ўсім першакласнікам падарунак ад Прэзідэнта Рэспублікі Беларусь Аляксандра Лукашэнкі – кнігу «Беларусь – наша Радзiма». Гэта першая кніга, якую вучні адкрыюць на сваім першым школьным ўроку. Вядома, што ў гэтым годзе выдавецтва «Пачатковая школа» падрыхтавала абноўленае выданне з мультымедыйным дыскам-дадаткам, а для настаўнікаў – метадычныя матэрыялы, якія дапамогуць арганічна спалучаць магчымасці традыцыйнага дапаможніка і электроннага прыкладання, але пакуль гэтую навінку змогуць убачыць толькі ў сталічных школах …
І вось празвінеў першы званок і дадзены старт новаму навучальнаму году! Па традыцыі ў неба былі запушчаны рознакаляровыя шары (можа аднаму з іх атрымаецца абудзіць сонейка, якое так і не вызірнула з-за воблака). І дзеці ўвайшлі ў расчыненыя дзверы.
Марына Вакульская
Алена Зялевіч