Як паведаміў начальнік РАСК Максім Басак, за мінулы тыдзень супрацоўнікамі аддзела было ўзбуджана пяць крымінальных спраў.
У жыцці амаль кожнага чалавека, мусіць, здараліся выпадкі, калі трэба было выбіраць: прыхапіць чужое ці прыслухацца да свайго сумлення і зрабіць усё па законе. Тое ж здарылася і з ураджэнкай в. Каралін, што на Камянеччыне, якая цяпер пражывае ў Столінскім раёне.
Жанчына вырашыла паправіць сваё фінансавае становішча за кошт жыхаркі таго ж раёна. Яны разам вярталіся з заробкаў з Зэльвенскага раёна і спыніліся ў в. Зіновічы, у знаёмага. Як часта бывае, дзе сустрэча — там і чарка.
Падчас застолля жанчыны выйшлі на вуліцу падыхаць свежым паветрам, і тут ураджэнка суседняга раёна заўважыла, што з задняй кішэні джынсаў пацярпелай на зямлю выпала 70 рублёў і апошняя гэтага не бачыць. Доўга не раздумвала, а можа, і выпітае спіртное не дазваляла цвяроза глядзець на рэчы, і прыхапіла грошы.
У адносінах да жанчыны ўзбуджана крымінальная справа па ч. 1 арт. 205 КК Рэспублікі Беларусь, згодна з якой ёй пагражае да трох гадоў пазбаўлення волі.