Завяршыўся дзяржаўны візіт Прэзідэнта Беларусі Аляксандра Лукашэнкі ў Зімбабвэ. У аэрапорце гэтай краіны кіраўніка дзяржавы праводзілі гэтак жа ўрачыста, як і сустракалі ў першы дзень візіту — з ротай ганаровай варты, выкананнем гімнаў і мясцовым каларытам — танцамі і песнямі, паведамляе БЕЛТА са спасылкай на Telegram-канал «Пул Першага».
У апошні дзень візіту беларускі лідар разам з Прэзідэнтам Зімбабвэ Эмерсанам Мнангагвам наведаў знакаміты вадаспад Вікторыя і кантактны заапарк. «Нястрымная моц воднага патоку параўнальная з сілай народа Зімбабвэ», — такі памятны запіс пакінуў Аляксандр Лукашэнка пасля азнаямлення з адной з галоўных славутасцей Зімбабвэ.
Затым кіраўнікі абедзвюх дзяржаў правялі перагаворы без прысутнасці прэсы і камер.
Як паведамлялася, Прэзідэнт Беларусі прыбыў у Зімбабвэ з дзяржаўным візітам 30 студзеня. У аэрапорце Харарэ яго сустракаў асабіста Эмерсан Мнангагва. Кіраўнікі дзяржаў паехалі з аэрапорта на адным аўтамабілі і прадоўжылі сустрэчу ў час нефармальнай вячэры.
Афіцыйная частка перагавораў прэзідэнтаў адбылася 31 студзеня. Аляксандр Лукашэнка і Эмерсан Мнангагва сустрэліся ў фармаце сам-насам і ў пашыраным складзе — з удзелам членаў дэлегацый з абодвух бакоў, а таксама падпісалі шэраг двухбаковых дакументаў, дамовіліся аб рэалізацыі інвестыцыйных і кааперацыйных праектаў у розных сферах, што стане асновай для прадаўжэння супрацоўніцтва. «У галіне прамысловасці, гандлю, сельскай гаспадаркі, энергетыкі, транспарту і здабычы карысных выкапняў. Мы таксама дамовіліся, што гэтыя кантракты і нашы дамоўленасці, якіх мы сёння дасягнулі, стануць асновай для прадаўжэння нашага супрацоўніцтва», — сказаў Аляксандр Лукашэнка.
Па выніках перагавораў з лідарам Зімбабвэ Прэзідэнт Беларусі падкрэсліў асаблівую ролю і месца Афрыкі ў сучасным свеце. «Афрыка даўно прачнулася. Без Афрыкі не можа быць перспектывы ў свеце наогул. Тут рэсурсы, тут людзі з кожным годам становяцца ўсё больш адукаванымі, сюды ідуць найноўшыя тэхналогіі. Без Афрыкі свет развівацца не можа, — заявіў беларускі лідар. — Без яе не можа быць ніякага планетарнага развіцця. Таму тут усе ўладныя людзі: і ЗША, і Кітай, і Расія, і Вялікабрытанія, увесь Еўрапейскі саюз і гэтак далей. Будучыня за Афрыкай».
«Таму мы тут. Гэта нашы сябры. Мы прыехалі да сяброў. Мы з імі дамаўляемся ў імя нашых народаў. Мы ідзём з мірам. Мы не ідзём, як некалі ішлі каланіялісты, як яны захоплівалі, эксплуатавалі народ. Мы нясём сюды тэхналогіі і абучаем ім тут людзей, рыхтуем спецыялістаў», — адзначыў беларускі лідар, гаворачы пра супрацоўніцтва з краінамі Афрыканскага кантынента.
У сваю чаргу Прэзідэнт Зімбабвэ падзякаваў Беларусі за дапамогу і падтрымку, якія сталі значным фактарам для таго, каб яго краіне раз і назаўсёды вырашыць пытанне харчовай бяспекі. «Мы гатовы дружыць з Беларуссю і з усімі краінамі, якія падзяляюць наш падыход. Не можа быць такога, каб адна краіна была канём, а другая — паганятым. Мы або ўсе разам коні, або паганятыя. Мы ўсе павінны быць у адной лодцы і глядзець аднолькава. З моманту нашай першай сустрэчы з Аляксандрам Лукашэнкам у нас выпрацавалася нейкая «хімія». І мы зразумелі, што аднолькава глядзім на рэчы, на развіццё нашых краін. З таго часу мы дружым і разам працуем на карысць нашых народаў», — падкрэсліў Прэзідэнт Зімбабвэ.
З удзелам лідараў краін 31 студзеня прайшла цырымонія перадачы тэхнікі беларускіх вытворцаў у рамках завяршэння другой фазы праграмы па механізацыі фермерскіх гаспадарак Зімбабвэ і старт трэцяй фазы праграмы. Мерапрыемства адбылося на базе Інстытута сельскай гаспадаркі Зімбабвэ.
«Хачу падзякаваць амерыканцам і ўсяму заходняму свету за тое, што яны ўвялі супраць нас санкцыі. У адваротным выпадку на гэтым вялікім полі стаялі б не беларускія трактары, а амерыканскія і нямецкія», — сказаў Аляксандр Лукашэнка. Яго тэзіс удзельнікі мерапрыемства падтрымалі бурнымі апладысментамі. «Вы павінны памятаць: нас раздзяляюць немалыя адлегласці, але мы гатовы заўсёды дапамагаць вам, мы гатовы прыняць вашу дапамогу. Мы гатовы вам падставіць плячо ў любы час, у любым месцы, вырашаючы самыя складаныя праблемы і задачы», — запэўніў беларускі лідар. Ён заклікаў народ Зімбабвэ захоўваць адзінства і пажадаў усім шчасця, міру і дабра, а таксама хлеба на сталах.
У дні візіту таксама адбыліся дзелавыя сустрэчы і перагаворы членаў беларускай дэлегацыі і прадстаўнікоў зімбабвійскага боку, прайшоў двухбаковы бізнес-форум.