Воскресенье, 14 июля 2024

Задача — стварыць зручныя ўмовы для выплаты падаткаў. Інтэрв’ю з начальнікам інспекцыі МПЗ па Пружанскім раёне Ірынай Басько

286

У другую нядзелю ліпеня сваё прафесійнае свята адзначаюць работнікі падатковых органаў Беларусі.

Пра будні службы мы пагутарылі з начальнікам інспекцыі Міністэрства па падатках і зборах Рэспублікі Беларусь па Пружанскім раёне Ірынай Басько.

— На працягу шэрага гадоў у падатковай службе адбываюцца пэўныя змяненні. Ірына Аляксандраўна, скажыце, якой Вы бачыце канчатковую мэту такіх пераўтварэнняў?

— У свой час мы пачыналі з ручнога прыёму дэкларацый і ўліку плацяжоў, вялікай колькасці заканадаўчых актаў, выбудоўвалі ўзаемаадносіны з кожным плацельшчыкам. Сёння мы сучасная дзяржслужба, якая актыўна развівае і прымяняе электронныя сэрвісы. Мы дыстанцыйна кантралюем паўнату выплаты плацяжоў у бюджэт, не ўмешваючыся ў дзейнасць плацельшчыкаў, забяспечваем амаль 90% паступленняў у кансалідаваны бюджэт раёна.

Канчатковая мэта пераўтварэнняў — гэта павышэнне эфектыўнасці работы падатковай сістэмы ў цэлым. Усе паслугі, якія аказваюцца плацельшчыкам, павінны быць максімальна камфортнымі для іх, нормы заканадаўства — простымі і зразумелымі, падатковая нагрузка — аптымальнай, а выкананне плацельшчыкамі сваіх абавязкаў перад бюджэтам не павінна выклікаць цяжкасцей і прыводзіць да вялікіх страт часу.

— Якія ж галоўныя функцыі сучаснай падатковай сістэмы?

— Перш за ўсё, гэта папераджальная і стымулюючая функцыі.

У цяперашніх няпростых умовах выкананне ўскладзеных на падатковыя органы задач як ніколі патрабуе ад нас прадуманых дзеянняў, максімальнай канцэнтрацыі сумесных намаганняў для забеспячэння поўнага і своечасовага паступлення даходаў у бюджэт, стварэння спрыяльнага дзелавога і інвестыцыйнага клімату ў краіне. Толькі той бізнес, які развіваецца паспяхова, можа нарошчваць падатковыя плацяжы, у чым і заключаецца інтарэс дзяржавы.

У фарміраванні даходнай часткі бюджэту Пружанскага раёна прымае ўдзел 35 431 плацельшчык, у тым ліку 486 арганізацый, 702 індывідуальныя прадпрымальнікі і 34 243 фізічныя асобы.

Важкі індывідуальны ўклад у бюджэт нашага раёна ўносяць буйныя падаткаплацельшчыкі: ААТ «Ружаны-Агра», ААТ «Жураўлінае», ААТ «Пружанскі льнозавод», КУВП «Камунальнік», ААТ «Пружанскі малочны камбінат».

Практычна 100% арганізацый і каля 80% індывідуальных прадпрымальнікаў раёна ўзаемадзейнічаюць з падатковай інспекцыяй толькі ў электронным фармаце. Актыўна падключаюцца да дыстанцыйнага ўзаемадзеяння з нашай службай і фізічныя асобы.

Дарэчы, што датычыцца фізічных асоб. З 1 студзеня 2023 года ўведзены новы рэжым падаткаабкладання — падатак на прафесійны даход. Створаны мабільны дадатак, які дазваляе плацельшчыку зарэгістравацца ў якасці самазанятага і стаць на падатковы ўлік, ажыццяўляць улік выручкі, атрымліваць звесткі аб суме падатку, якая падлягае выплаце. За 6 месяцаў у дадатку ўжо зарэгістравалася 282 плацельшчыкі раёна, якімі выплачана ў бюджэт 31,8 тыс. руб. падатку на прафесійны даход.

— І ўсё ж, Ірына Аляксандраўна, асноўная задача падатковых органаў — гэта ажыццяўленне кантролю за паўнатой і своечасовасцю выплаты падатковых плацяжоў у бюджэт. Ці ўсе нашы плацельшчыкі добраахвотна выконваюць падатковыя абавязацельствы?

— Мы не першы год працуем па выбудаванай сістэме папярэджання правапарушэнняў у падатковай сферы. Таму сёння, як і раней, асноўны акцэнт у нашай кантрольнай дзейнасці зроблены на прафілактычныя мерапрыемствы, камеральны кантроль.

Большасць падаткаплацельшчыкаў нашага раёна добрасумленная і дысцыплінаваная. У добраахвотным парадку выплачваецца больш за 95% паступленняў у бюджэт.

Кожны год у нас зніжаецца колькасць праверак. У зону ўвагі кантрольных падраздзяленняў інспекцыі трапляе толькі 1-2% плацельшчыкаў. А калі казаць непасрэдна пра кантрольныя мерапрыемствы і выязныя праверкі, то праводзяцца яны ў дачыненні да не больш чым 0,5% плацельшчыкаў. Гэта сведчыць пра тое, што падатковая служба зараз выбудоўвае работу так, каб яе дзейнасць была для плацельшчыкаў як мага менш цяжкай і па магчымасці незаўважнай.

Застаецца актуальнай работа падатковых органаў, накіраваная на процідзеянне выплатам зарплаты «ў канвертах» і выяўленне ўтоенай ад падаткаабкладання выручкі, што вельмі цесна ўзаемазвязана паміж сабой. Усе разумеюць, што для выплаты «нелегальнай» заработнай платы патрэбны грошы, не адлюстраваныя ва ўліку. Такім чынам, адно парушэнне заканадаўства цягне за сабой іншыя.

За 2022 год і мінулы перыяд бягучага года работнікамі інспекцыі выяўлена 19 суб’ектаў гаспадарання, якія парушаюць устаноўлены парадак прыёму наяўных грашовых сродкаў і выкарыстання касавага абсталявання, 8 суб’ектаў гаспадарання, у якіх устаноўлены факты выплаты зарплаты «ў канвертах». Вінаватыя асобы былі прыцягнуты да адміністрацыйнай адказнасці ў выглядзе штрафу на суму 18,1 тыс. руб., дадаткова паступіла ў бюджэт 56,7 тыс. рублёў падаходнага падатку з фізічных асоб.

Карыстаючыся выпадкам, хачу яшчэ раз папрасіць нашых грамадзян не паддавацца на ўгаворы нядобрасумленных суб’ектаў гаспадарання, якія наймаюць на працу без заключэння працоўных або іншых грамадзянска-прававых дагавораў, таму што ў выніку такой супрацьпраўнай дзейнасці грамадзяне страчваюць магчымасць аплаты бальнічных лістоў, налічэння пенсій, атрымання крэдытаў і многага іншага.

— Якімі ж якасцямі павінен сёння валодаць падатковы інспектар?

— Нашым супрацоўнікам даводзіцца сутыкацца з самымі рознымі сітуацыямі, і для таго, каб у іх разабрацца, неабходна валодаць шырокімі ведамі не толькі ў галіне падатковага заканадаўства. Каб адбыцца ў прафесіі падатковага інспектара, спецыяліст павінен быць не толькі граматным, але і ініцыятыўным, выканаўчым, сумленным і адказным. У зносінах з плацельшчыкамі ён абавязаны пры любых абставінах быць ветлівым, карэктным і захоўваць вытрымку.

Збіраць бюджэт краіны — гэта адказная і ганаровая праца. Яна патрабуе высокіх прафесійных і маральных якасцей і навыкаў. Работнікі падатковых органаў сваёй працай фарміруюць бюджэт рэгіёна і краіны ў цэлым, уносяць важкі ўклад у эканоміку Рэспублікі Беларусь.

Наша інспекцыя неаднаразова станавілася пераможцай і займала прызавыя месцы па выніках работы падатковых органаў вобласці. Сёння інспекцыя ўкамплектавана высокакваліфікаванымі кадрамі, якія пастаянна павышаюць свой прафесійны ўзровень. Кадравы склад адрозніваецца стабільнасцю: 42% работнікаў маюць стаж дзяржслужбы больш за 20 гадоў.

Напярэдадні прафесійнага свята за шматгадовую плённую працу ў падатковых органах, высокія паказчыкі ў рабоце і асабісты ўклад у агульныя вынікі супрацоўнікі інспекцыі МПЗ па Пружанскім раёне адзначаны ведамаснымі ўзнагародамі рознага ўзроўню. Ганаровай граматай Міністэрства па падатках і зборах Рэспублікі Беларусь узнагароджана начальнік аддзела кантрольнай работы Таццяна Вітальеўна Ганіна. Намеснік начальніка аддзела кантрольнай работы Алена Лявонцьеўна Грышчук узнагароджана Ганаровай граматай інспекцыі МПЗ па Брэсцкай вобласці. Намеснік начальніка інспекцыі Наталля Васільеўна Пулікоўская ўзнагароджана Граматай Пружанскага раённага выканаўчага камітэта.

Прафесіяналізм заўсёды быў і застаецца асновай дабрабыту і кожнага асобнага чалавека, і дзяржавы ў цэлым. Менавіта праца, адказная і сумленная, дапамагае нам дасягаць пастаўленых мэт, вырашаць задачы, якімі б складанымі яны ні здаваліся, і ісці наперад у сваім развіцці.


Паважаныя калегі! У нас важная місія — стаяць на варце эканамічных інтарэсаў і фінансавай бяспекі краіны. Ад сумленнай і карпатлівай працы работнікаў падатковых органаў залежыць дабрабыт роднай Беларусі і кожнага яе жыхара. Няхай вам пакараюцца самыя цяжкія мэты, няхай поспех спадарожнічае ўсім пачынанням, накіраваным на ўмацаванне дзяржаўных асноў Рэспублікі Беларусь. Жадаю высокіх асабістых дасягненняў, правільных рашэнняў, упэўненасці ў будучыні. Не губляйце аптымізму, добрага настрою. Шчасця вам і вашым сем’ям.

Дзякуем ветэранам падатковай службы за вернасць прафесійнаму доўгу і бясцэнны ўклад у развіццё падатковай сістэмы нашай краіны. Шчыра жадаем усім вам і вашым блізкім моцнага здароўя, сямейнага дабрабыту, удачы ва ўсіх справах.

А падаткаплацельшчыкам хочацца пажадаць своечасова і добрасумленна выконваць падатковыя абавязацельствы, забяспечваючы тым самым рост паступленняў у бюджэт і, як следства, росквіт нашай цудоўнай краіны.

Гутарыла Вольга Басак