Наша знаёмства з моладдзю, якая прыехала на работу ў Пружаны і раён, працягваецца. Даведваемся, як сустрэлі ў новым калектыве і як клапоцяцца на першым працоўным месцы ў маладога спецыяліста з дзіцячага сада № 3 г. Пружаны.
Маладая выхавацельніца дашкольнай адукацыі дзіцячага садка № 3 г. Пружаны Паліна Давідзюк нарадзілася ў Пружанскім раёне ў аграгарадку Лінова. Дзяўчына скончыла Ваўкавыскі педагагічны каледж па спецыяльнасці «Абслугоўваючая праца і выяўленчае мастацтва». Цяпер Паліне Сяргееўне 20 гадоў, і яна працягвае ўдасканальваць і павышаць сваю кваліфікацыю ў прафесіі.
— Апроч сваёй працы я вырашыла працягнуць атрымліваць адукацыю па сваім профілі і паступіла ў Брэсцкі дзяржаўны ўніверсітэт імя А.С. Пушкіна на факультэт фізічнага выхавання і спорту, цяпер з’яўляюся студэнткай другога курса. Выбрала сваю прафесію па закліку сэрца, бо люблю дзяцей і мне падабаецца працаваць з імі. Таксама немалую ролю ў гэтым выбары адыграла і мая маці Таццяна Мікалаеўна, якая працуе ў Ліноўскім дзіцячым садку кіраўніком фізічнага выхавання, яна з’яўляецца для мяне прыкладам, — адзначыла дзяўчына.
Па словах Паліны Сяргееўны, сустрэлі яе ў садку вельмі цёпла і стварылі ўсе ўмовы для працы. Калектыў заўсёды гатовы працягнуць руку дапамогі ў цяжкую мінуту.
— Мне падабаецца мая прафесія, аднак, як і ўсюды, бываюць цяжкія моманты, але я з імі спраўляюся, бо ў мяне ёсць выдатныя настаўнікі Надзея Васільеўна Юрэня і Юлія Віктараўна Ільяшэвіч, да якіх я магу звярнуцца ў любую мінуту, ведаю, што яны прыйдуць на дапамогу. З прыемнасцю хочацца адзначыць і клопат з боку арганізацыі ў плане дадатковых выплат. Так, напрыклад, за падпісанне кантракта я атрымліваю выплату ў памеры 40 працэнтаў ад акладу, што даволі нядрэнная грашовая сума. Акрамя гэтага, маладому спецыялісту даюцца яшчэ і тры дадатковыя дні да асноўнага водпуску. А яшчэ стараюся актыўна ўдзельнічаць у розных мерапрыемствах, за якія таксама прадугледжаны выплаты. Наогул на рабоце мяне ўсё задавальняе, і людзі спагадныя, і зарплата годная, — падкрэсліла малады спецыяліст.
Гутарым са старшынёй пярвічнай прафсаюзнай арганізацыі ДУА «Дзіцячы сад № 3 г. Пружаны» Таццянай Сёмухай.
— Што робіцца з боку арганізацыі для таго, каб малады работнік як мага хутчэй стаў паўнавартаснай часткай вашай працоўнай сям’і?
— Наш калектыў заўсёды з цеплынёй сустракае новага работніка і падтрымлівае яго. Хоць у маладых спецыялістаў яшчэ няма дастатковага вопыту, аднак яны ўжо могуць унесці ўклад у работу сваімі свежымі і новымі ідэямі, якіх у іх шмат… Адным з галоўных гарантаў добрай атмасферы на працы лічым правядзенні мерапрыемстваў у калектыве, якія для нас з’яўляюцца не рэдкімі. У ходзе іх малады спецыяліст хутчэй знаходзіць кантакт з усімі работнікамі ўстановы, а таксама раскрывае свае таленты, што добра як і для самой арганізацыі, так і для маладога работніка. Наша моладзь актыўна прымае ўдзел у розных паездках. Паколькі ім цікавая гісторыя нашай краіны, летась Пружанскім раённым камітэтам прафсаюза работнікаў адукацыі і навукі была арганізавана двухдзённая паездка ў гістарычны горад Полацк, усім вельмі спадабалася.
— Якія ж бонусы ёсць для маладых спецыялістаў у Вашай установе?
— Насамрэч іх даволі многа. Як ужо згадвала Паліна Сяргееўна, ёсць добрая надбаўка за падпісанне кантракта ў памеры 40 працэнтаў, да якіх прыкладаецца тры дадатковыя дні водпуску, замест двух, якія даюцца работнікам без гэтага статусу. Існуюць у нашай арганізацыі надбаўкі і за павышэнне кваліфікацыйнага ўзроўню — 20 працэнтаў, за дзейсны ўдзел у раённых конкурсах —30 працэнтаў ад акладу і многія іншыя. Таму наша моладзь мае добры стымул паводзіць сябе актыўна.
Руслан Басак
Фота Кацярыны Масік