У мінулую суботу ў аддзеле ЗАГС Пружанскага райвыканкама была праведзена сотая ў гэтым годзе рэгістрацыя шлюбу.
Здавалася б звычайная цырымонія ў ЗАГСе аказалася не такой ужо і звычайнай для 25-гадовых Наталлі Жабрун і Яўгена Ануфрыенка: урачыстасць з выпадку стварэння іх сям’і стала гістарычнай.
Маладыя людзі пазнаёміліся больш года таму — яны былі сведкамі на вяселлі сваіх сяброў.
Гулянне закончылася, і жыццё вярнула іх да штодзённых клопатаў: Наталля працуе настаўніцай гісторыі ў СШ №5 г.Пружаны, Яўген — вадзіцелем у Ваўкавыскім РАНС. Але нягледзячы на адлегласць і не такія ўжо частыя магчымасці для сустрэч, узаемная сімпатыя перарасла ў сапраўдныя пачуцці.
Пра тое, што Наталля і Яўген сталі сотай парай, якая сёлета зарэгістравала свае адносіны ў аддзеле ЗАГСа Пружанскага райвыканкама, маладыя даведаліся толькі непасрэдна падчас цырымоніі ўзяцця шлюбу.
Акцэнт на віншаванні сотай пары маладажонаў — паставілі невыпадкова.
— У 2017 годзе органы ЗАГСа Беларусі адзначаюць знамянальную дату ў сваёй гісторыі — стагоддзе з дня ўтварэння, — зазначыла падчас урачыстасці загадчыца аддзела ЗАГСа Наталля Цібароўская. — Гэтая знакавая лічба стала нагодай для таго, каб сотую цырымонію ўступлення ў шлюб зрабіць сапраўды адметнай.
Акрамя адпаведнага пасведчання, Наталля Радзівонаўна ўручыла новай сям’і памятны падарунак — сувенірную талерку, якая будзе нагадваць не проста пра дзень стварэння іх сям’і, але і пра падзею, з якой ён супаў.
Пажаданні дажыць у міры і згодзе як мінімум да «залатога» вяселля адрасавала новаспечаным мужу і жонцы Ануфрыенкам і старшыня раённага аб’яднання арганізацый прафсаюзаў Т.Ю.Гаманчук, якая таксама падрыхтавала падарунак маладым. 
Да віншаванняў, вядома, далучыліся і бацькі Наталлі і Яўгена, родныя і сябры, якія сабраліся на ўрачыстасці, каб раздзяліць з імі радасць гэтай падзеі.
Хто ведае, магчыма Наталля і Яўген Ануфрыенкі некалі адзначаць не толькі «залатое» ды «брыльянтавае» вяселлі, але і «чырвонае» — стагоддзе сямейнага саюзу? Нездарма ж напачатку іх сумеснага шляху — «зялёнага» вяселля, як называюць дзень утварэння сям‘і — лічба 100 аказалася знакавай.
Марына ВАКУЛЬСКАЯ, Сяргей ТАЛАШКЕВІЧ (фота).