Каб высветліць ступень актыўнасці такога дыялогу, былі прааналізаваны работа са зваротамі грамадзян, парадак правядзення адміністрацыйных працэдур і аператыўнасць інфармавання насельніцтва.
Звароты грамадзян — на кантролі
З пачатку бягучага года ў райвыканкам паступіла 304 звароты, што крыху больш, чым за аналагічны перыяд 2022 года. Пераважная большасць — гэта пісьмовыя звароты або тэлефанаванні на «прамую тэлефонную лінію». У дадатак паступіла і 82 даручэнні вышэйшых органаў, якія былі звязаны са зваротамі грамадзян, што пражываюць за межамі раёна.
У асноўным запыты тычыліся:
- рамонту, будаўніцтва і ўтрымання дарог;
- працаўладкавання, занятасці насельніцтва і аховы працы;
- аховы навакольнага асяроддзя і рацыянальнага выкарыстання прыродных рэсурсаў.
Акрамя таго, рэгістраваліся і калектыўныя звароты (сёлета — 20). Іх тэматыка закранала добраўпарадкаванне дарог і вуліц сельскіх населеных пунктаў, горада Пружаны, а таксама тычылася парадку на прыдамавых тэрыторыях і тэрыторыях агульнага карыстання. Найбольшая колькасць калектыўных зваротаў паступіла ад жыхароў Шаняўскога сельсавета.
Як паказвае колькасны і якасны аналіз зваротаў, на ўзроўні райвыканкама забяспечана работа з заяўнікамі і выпрацаваны меры рэагавання, накіраваныя на ўзнаўленне парушаных правоў грамадзян. Патрабаваннямі Дырэктывы № 2 прадугледжана, што стварэнне ўмоў для забеспячэння нармальнай жыццядзейнасці грамадства, павышэнне якасці аказання паслуг насельніцтву з’яўляецца першачарговай задачай. І не ўсюды гэта выконваецца адказнымі арганізацыямі.
Напрыклад, сёлета ў першым паўгоддзі ўзнікалі пытанні неналежнай якасці пітной вады ў сетках в. Новыя Засімавічы. Неаднаразова падчас тэлефонных званкоў вызначалася праблематыка функцыянавання сетак каналізацыі па вул. К.Марача ў г. Пружаны і ў пас. Інтэрнацыянальны, адлову безнаглядных жывёл на тэрыторыях сельскіх населеных пунктаў. Актуальным застаецца пытанне рэагавання КУВП «Камунальнік» на заяўкі з нумара службы «115».
Выяўлены недахопы і ў рабоце ААТ «Радзіма» і «Жураўлінае», звязаныя з пытаннямі набыцця службовага жылля.
Усе пералічаныя недахопы паказваюць на недастатковы ўзровень работы на месцах з боку службаў, што пацвярджаюць асабістыя, выязныя прыёмы, «прамыя тэлефонныя лініі», арганізаваныя кіраўніцтвам райвыканкама. У выніку за мінулы перыяд 2023 года за неналежны разгляд зваротаў грамадзян і юрыдычных асоб да дысцыплінарнай адказнасці прыцягнута чатыры спецыялісты.
Як працуе «Адно акно»?
У гэтай службе спецыяльна арганізаваны зручны для насельніцтва рэжым работы: панядзелак, аўторак, чацвер, пятніца — з 08.00 да 17.00, серада — з 08.00 да 20.00, без перапынку на абед.
З пачатку бягучага года па пытаннях ажыццяўлення адміністрацыйных працэдур у райвыканкам паступіла 1618 заяў грамадзян, або 138 % да аналагічнага леташняга перыяду. А вось колькасць зваротаў суб’ектаў гаспадарання ўзрасла больш чым удвая. Усе заявы як ад фізічных, так і юрыдычных асоб разгледжаны ва ўстаноўленыя заканадаўствам тэрміны. Заявы па пытаннях выдачы даведак і выпісак з дзяржаўных рэгістраў разглядаліся ў дзень звароту. Наладжаная аператыўнасць пацвярджаецца і тым, што скаргаў і даручэнняў вышэйшых дзяржаўных органаў наконт разгляду адміністрацыйных скарг на рашэнне райвыканкама не паступала. Больш за тое, Галоўным упраўленнем юстыцыі Брэсцкага аблвыканкама сёлета быў праведзены маніторынг дзейнасці службы «Адно акно» райвыканкама, прааналізаваны паказчыкі ведамаснай справаздачнасці. Таксама спецыялісты службы былі правераны з дапамогай метаду «таемнага наведвальніка». У выніку парушэнняў нормаў дзеючага заканадаўства не ўстаноўлена.
Ці наладжана сувязь з грамадствам?
У рамках работы па інфармаванні насельніцтва мясцовымі ўладамі прымаюцца наступныя меры:
- забяспечана функцыянаванне дзяржаўнай адзінай (інтэграванай) рэспубліканскай інфармацыйнай сістэмы ўліку і апрацоўкі зваротаў;
- захавана практыка правядзення кіраўніцтвам «прамых тэлефонных ліній» па графіку кожную суботу месяца з 09.00 да 12.00, выязных асабістых прыёмаў грамадзян і прадстаўнікоў юрыдычных асоб не радзей чым адзін раз у квартал;
- працягвае дзейнічаць па чацвяргах з 16.00 да 18.00 грамадская прыёмная райвыканкама;
- функцыянуе па тэлефоне 2-15-12 у працоўныя дні з 08.00 да 13.00, з 14.00 да 17.00 «гарачая лінія» па пытаннях даведкава-кансультацыйнага характару;
- перагледжаны асабістыя прыёмы грамадзян і юрыдычных асоб кіраўніцтвам райвыканкама і сельскіх выканкамаў.
У дадатак сёлета інфармацыйна-прапагандысцкімі групамі райвыканкама праведзена шэсць адзіных дзён інфармавання, яшчэ было арганізавана 27 сустрэч з працоўнымі калектывамі.
Аддзелам ідэалагічнай работы і па справах моладзі райвыканкама забяспечваецца вядзенне афіцыйных акаўнтаў у сацыяльных сетках і месенджарах. Уцягнутасць насельніцтва ў лакальныя сеткавыя супольнасці стабільна павялічваецца. З мінулагодняга кастрычніка ў інтэрнэт-рэсурсе «Вконтакте» функцыянуе суполка «Пружаны. Зрабі лепш», якая дазваляе выносіць на абмеркаванне пытанні і пачуць меркаванні грамадзян. Сёлета было размешчана ўжо 17 такіх запісаў, дзе жыхары раёна выказалі сваё гледжанне адносна спрэчных пытанняў забеспячэння жыццядзейнасці.
Новыя формы работы дазваляюць прыцягнуць увагу грамадзян, выхоўваць культуру выказвання крытычных заўваг у адрас мясцовай улады, а таксама адпаведных арганізацый і службаў, зацікавіць абмеркаваннем спрэчных пытанняў, папярэдзіць неабгрунтаваныя звароты.
У той жа час праблема аператыўнасці зваротнай сувязі з боку адказных раённых службаў па-ранейшаму застаецца актуальнай, і звязана яна з адсутнасцю інфармавання аб выкананых даручэннях, што сведчыць аб недастатковым кантролі з боку кіраўнікоў за гэтым пытаннем. У разрэзе такой праблемы ўзорам для правільна арганізаванай работы можна назваць работу па інфармаванні грамадства, якая праводзіцца Пружанскім раёнам газазабеспячэння і УАЗ «Пружанская цэнтральная раённая бальніца».
Алена Хатулева, начальнік аддзела па рабоце са зваротамі грамадзян і юрыдычных асоб райвыканкама