На працягу трох дзён на тэрыторыі нашага раёна праходзіла шматдзённая велагонка сярод мужчын і юніёраў у праграме чэмпіянату і першынства Рэспублікі Беларусь па веласіпедным спорце на шашы на прызы «Сельскай газеты». Паколькі велашматдзёнка праходзіць выключна па тэрыторыі Брэсцкай вобласці, гэтыя спаборніцтвы часта яшчэ называюць Тур дэ Брэст.
З кожным годам арганізацыя спаборніцтваў выходзіць на больш высокі ўзровень. Удзельнікамі велагонкі сёлета сталі каля 150 спартсменаў. Гэта каманды з усіх абласцей і Мінска, а таксама госці з Украіны.
Старт быў дадзены 9 жніўня на грабным канале ў Брэсце. Тут, акрамя пяцікіламятровага пралогу, прайшлі спаборніцтвы для дашкольнікаў. А ўвогуле велагонка складалася з шасці этапаў працягласцю ад 120 да 160 кіламетраў. Веласіпедысты спыняліся ў Высокім, Пружанах і Бярозе. Большасць этапаў прайшло па дарогах мясцовага значэння ў раёне Высокага, Камянца і Пружан, а таксама рэспубліканскіх трасах.
У Пружаны велагоншчыкі прыбылі ў мінулую пятніцу вечарам пасля чацвёртага этапу Высокае-Абяроўшчына-Пагранічная-Шарашова-Пружаны. Лепшыя з іх атрымалі ўзнагароды на плошчы ля Дома Саветаў.
Пяты этап велагонкі праходзіў па маршруце Пружаны-Віскулі-Лыскава-Новыя Засімавічы-Пружаны. У нядзелю гоншчыкі спаборнічалі на заключным этапе Пружаны-Бяроза. Такім чынам, за шэсць дзён было пераадолена каля 800 кіламетраў.
Пасля кожнага з этапаў лепшых велагоншчыкаў чакалі кубкі, прызы ад спонсараў і інфармацыйных партнёраў. Галоўны прыз ад рэдакцыі «Сельскай газеты» — тэлевізар атрымаў Канстанцін Будкевіч з Мінскай вобласці, а ўся яго каманда першынствавала ў камандным заліку. Сярод юніёраў перамогу святкаваў прадстаўнік Брэстчыны Павел Пашук.
У ліку тых, хто адгукнуўся падтрымаць удзельнікаў велагонкі для папулярызацыі здаровага ладу жыцця, былі і нашы сельгаспрадпрыемствы — ААТ «Аранчыцкая птушкафабрыка» і «Ружаны-Агра».
На здымках: падчас узнагароджання пераможцаў чацвёртага этапу велагонкі; прызы ўручае чэмпіён XXII Алімпійскіх гульняў Алег Логвін.
Мікола АРХУЦІК
Фота Алены Зялевіч