Юныя артысты ўзорнага ансамбля эстраднага танца «Рубікон» Пружанскага раённага цэнтра культуры смела кідаюць выклік любым перашкодам, удасканальваючы сваё майстэрства і дасягаючы новых вяршынь на сваім бліскучым творчым шляху.
Гісторыя калектыву бярэ свой пачатак у далёкім 1993 годзе, а ў 2002-м, дзякуючы бездакорнаму выканальніцкаму майстэрству і творчай энергіі, ансамбль быў удастоены ганаровага звання «Узорны аматарскі калектыў». Гэта стала першым значным прызнаннем іх таленту і адданасці мастацтву.
2023 год прынёс калектыву яшчэ адну знакавую ўзнагароду: «Рубікон» быў узнагароджаны дыпломам Пружанскага райвыканкама як лепшы калектыў аматарскай творчасці і занесены на раённую Дошку гонару.
Нязменным натхняльнікам і кіраўніком ансамбля з’яўляецца Святлана Уладзіміраўна Салавей, а з 2018 года балетмайстар Ірына Аляксандраўна Макарэвіч дапамагае ёй ажыццяўляць смелыя харэаграфічныя задумы.
Сёння «Рубікон» — гэта віхор яркіх эмоцый, фантан маладосці і нястрымнай энергіі. Сэрца яго б’ецца ў рытме танца, аб’ядноўваючы вучняў сярэдніх школ горада ва ўзросце ад 8 да 17 гадоў. А для самых юных талентаў ад 5 да 8 гадоў працуюць тры падрыхтоўчыя групы — будучыя зоркі, якія з часам далучацца да асноўнага складу калектыву, працягваючы яго слаўныя традыцыі.
Ансамбль — жаданы госць на шматлікіх дзіцячых і маладзёжных шоу-праграмах, канцэртах і феерычных тэатралізаваных прадстаўленнях Палаца культуры. Іх рэпертуар — гэта тонкае перапляценне эстрадных і народных танцаў, узбагачаных сучаснай харэаграфіяй і актуальнай музыкай. Кожны нумар «Рубікона» — не проста рух, а глыбокая харэаграфічная думка, увасобленая ў сучасным стылі выканання і падкрэсленая арыгінальнымі, часам казачнымі касцюмамі.
Сваё бліскучае майстэрства ўдзельнікі ансамбля штогод дэманструюць і на міжнароднай арэне, нязменна пакараючы журы і гледачоў на прэстыжных фестывалях-конкурсах і вяртаючыся дадому з заслужанымі прызавымі месцамі.
2025 год ужо ўнёс новыя, яркія старонкі ў летапіс перамог «Рубікона»:
рДыплом II ступені ў намінацыі «Эстрадны танец» XVIII Міжнароднага завочнага конкурсу харэаграфічнага мастацтва «Збіраем таленты» (г. Санкт-Пецярбург);
-Дыплом лаўрэата II ступені ў намінацыі «Эстрадны танец/змешаная група» і дыплом лаўрэата III ступені ў намінацыі «Эстрадны танец/узроставая катэгорыя 11-14 гадоў» на VIII Міжнародным конкурсе выканальніцкіх відаў мастацтваў «Сябры-2025» (г. Мінск);
-Дыплом лаўрэата I ступені ў намінацыі «Вулічныя напрамкі/змешаная група» і дыплом лаўрэата II ступені ў намінацыі «Эстрадны танец/узроставая катэгорыя 11-14 гадоў» на VI Міжнародным завочным конкурсе «LetoStar-2025» (г. Мінск).
Кульмінацыяй восеньскага сезона стаў VIII Міжнародны танцавальны конкурс «Happy star dance fest — 2025», дзе 26 кастрычніка «Рубікон» зноў бліснуў на сцэне Брэсцкага дзяржаўнага абласнога цэнтра маладзёжнай творчасці. Некалькі конкурсных нумароў ансамбля выклікалі бурныя авацыі і атрымалі найвышэйшую ацэнку як ад кампетэнтнага журы, так і ад захопленых гледачоў.
Па выніках гэтага творчага спаборніцтва калектыў атрымаў дзве высокія ўзнагароды ў намінацыі «Эстрадны танец»: ва ўзроставай групе «змешаная» дыплом лаўрэата II ступені за танец «Лясная кругаверць», а ў групе «юніёры» — дыплом лаўрэата III ступені за харэаграфічны нумар «Дзе мы з табой…».
— Мы не збіраемся спыняцца на дасягнутым, — з упэўненасцю заяўляе кіраўнік ансамбля Святлана Салавей. — Кожны дзень — гэта новая магчымасць для росту, для адкрыцця чагосьці новага ў сабе і ў танцы.
Гэтыя трыумфы даказваюць, што для «Рубікона» няма непераадольных вышынь, а толькі новыя гарызонты для танца, натхнення і вечнага руху наперад!
Крысціна Асіпчук
Фота прадастаўлена ДУК «Пружанскі раённы цэнтр культуры»