Суббота, 15 июня 2024

Рэцэпты на Біс. Свініна з журавінамі і чарнаслівам ад Таццяны Зеляняк

126

Рэцэпт ад вядучага бухгалтара Брэсцкай абласной сельскагаспадарчай доследнай станцыі Таццяны Міхайлаўны Зеляняк.

Для гэтай стравы падыдзе як свіное філе, так і рабрынкі. Ступень тлустасці мяса можаце выбраць на свой смак.

ІНГРЭДЫЕНТЫ:

свініна — 1 кг,
чарнасліў без костачак — 130-150 г,
журавіны — 130-150 г,
соль, чорны перац — на смак,
алей для абсмажвання.

ПРЫГАТАВАННЕ

Наразаем мяса на буйныя кавалкі, солім, перчым. Выкладваем на добра разагрэтую патэльню і абсмажваем на алеі да залацістай скарыначкі. Агонь павінен быць вышэй за сярэдні! Смажым мяса порцыямі, каб кожны кавалачак дакранаўся да патэльні.

Журавіны і чарнасліў прамываем вадой, буйны чарнасліў разразаем на 2-3 часткі. Абсмажанае мяса кладзём у казан або каструлю з тоўстым дном, пераслойваючы чарнаслівам і журавінамі. Наліваем ваду да ўзроўню верхняга слоя мяса. Калі вада закіпіць, крыху пасаліце страву на смак. Тушым свініну прыкладна адну гадзіну пад накрыўкай на невялікім агні. Перыядычна паглядайце пад накрыўку — вада не павінна поўнасцю выкіпець, каб мяса засталося ў журавінава-чарнаслівавым соусе.

Смачна есці!