Рэцэпт ад жыхаркі г. Пружаны Алены Бабрук
Мне падабаецца незвычайна афармляць стравы. Гэта няцяжка, але нават простая ежа ўпрыгожыць святочны стол. Напрыклад, можна выкласці звычайную салату аліўе ў форме вожыка (замест калючак выкарыстоўваем кавалачкі чорных маслін). Халадзец заліць не ў міску, а ў бутэльку з-пад малака, а калі застыне, зняць яе, з кавалачкаў каўбасы зрабіць «вушкі» і «пятачок», з гарошынак перцу — «вочкі», атрымаецца парася. Прыгожа глядзіцца на стале і гэтая салата.
ІНГРЭДЫЕНТЫ:
курыная грудка — 250 г,
яйкі — 3 шт.,
сыр цвёрдых гатункаў — 150 г,
вінаград — 400 г,
маянэз — прыкладна 100 г,
алей — 1 ст. лыжка,
соль, прыправа кары — на смак,
зеляніна для ўпрыгажэння.
ПРЫГАТАВАННЕ:
Курыную грудку адварваем у падсоленай вадзе, наразаем кубікамі, абсмажваем на патэльні з алеем і кары (літаральна некалькі мінут, не перасушыце!). Яйкі варым укрутую і дробна наразаем, сыр націраем на тарцы.
Выкладваем салату на плоскай талерцы слаямі, у форме вінаграднай гронкі. Першы слой — курыца (робім на ім маянэзную сетачку), другі — яйкі, трэці — сыр. Зверху таксама змазваем маянэзам. Віна-градзіны разразаем напалам, калі ёсць костачкі — выдаляем. Шчыльна адна да адной выкладваем палавінкі вінаграду на салату. Упрыгожваем любой зелянінай (калі ёсць вінаградныя лісцікі, яны будуць глядзецца лепш за ўсё).
Смачна есці!