Среда, 21 февраля 2024

Рэцэпты на Біс. Цірамісу «Класіка» ад Алёны Сабітавай

166

Рэцэпт ад вядучага спецыяліста па маркетынгу Брэсцкай абласной сельскагаспадарчай доследнай станцыі Алёны Сабітавай.

Напачатку лістапада нас чакаюць доўгія выхадныя. Можна і на кухні больш часу патраціць, і парадаваць сям’ю салодкасцямі ўласнага прыгатавання. Напрыклад, такім вось італьянскім дэсертам цірамісу, які вельмі любіць мая дачка. Назвы прадуктаў для прыгатавання яго гучаць экзатычна, але ў продажы ў сеткавых магазінах яны ёсць.

ІНГРЭДЫЕНТЫ:

пячэнне «Саваярдзі» — 200 г (24 штукі),
сыр «Маскарпоне» — 400-500 г,
яйкі — 4 шт.,
цукровая пудра — 5 ст. лыжак,
кава моцна завараная або «эспрэса» — 300 мл,
каньяк (можна замяніць лікёрам «Амарэта» або апельсінавым сіропам) — 3 ст. лыжкі,
шакалад горкі або какава-парашок — на смак.

ПРЫГАТАВАННЕ

Яечныя бялкі ўзбіць у моцную пену, у канцы ўзбівання можна дадаць у яе крыху цукровай пудры. Ад шчыльнасці пены будзе залежаць, ці не расцячэцца крэм.

Жаўткі расцерці з цукровай пудрай, дадаць сыр «Маскарпоне» і добра размяшаць. У гэты крэм лыжкай пакрышку дадаваць узбітыя бялкі і акуратна перамешваць.

Астуджаную каву змяшаць з каньяком. У гэтую сумесь на 4-5 секунд па чарзе акунаць пячэнькі (вельмі хутка размакаюць!) і адразу выкладваць у форму. Зверху выкласці палову крэму. На яго — другую палову пячэння, змочанага ў каве з каньяком. І наверх — астатні крэм, які добра разраўняць. Паставіць у халадзільнік на 5-6 гадзін (можна на ноч).

Перад падачай на стол дэсерт пасыпаць нацёртым шакаладам або парашком какавы.

Смачна есці!