На мінулым тыдні дэпутат Палаты прадстаўнікоў Нацыянальнага сходу Рэспублікі Беларусь Леанід Качына правёў рабочы дзень на Пружаншчыне. 
Планам паездкі народнага абранніка па акрузе быў прадугледжаны прыём грамадзян. Трапіць на сустрэчу з дэпутатам можна было па папярэднім запісе. Сярод тых, хто вырашыў звярнуцца па дапамогу да дэпутата, было пяцёра жыхароў раёна. Але варта адзначыць, тры з пяці пытанняў пачалі вырашацца яшчэ да таго, як Л.І.Качына прыехаў у акругу. Напрыклад, было аказана садзейнічанне заяўніцы, сусед якой, што жыве паверхам ніжэй, пераўтварыў сваю кватэру ў смеццязвалку. У КУВП «Камунальнік» паабяцалі растлумачыць «плюшкіну», чым для яго можа скончыцца развядзенне антысанітарыі. Падчас размовы жанчына пацвердзіла, што мужчына сапраўды стаў паступова пазбаўляцца ад бытавых адходаў і смецця.
На вырашэнне прыватнага пытання жыхаркі вёскі Семянча, якое тычылася падключэння інтэрнэту, таксама не давялося марнаваць шмат часу: спецыялісты службы «Белтэлекам» змаглі знайсці спосаб рашэння праблемы яшчэ да таго, як Л.І.Качына прыехаў у рэгіён. Таму жанчыне таксама не прыйшлося сядзець у чарзе на прыём да дэпутата.
Па аб’ектыўных прычынах дыстанцыйна вырашаецца пытанне гараджанкі, якая ўзняла пытанне аб памяншэнні гандлёвага збору на міні-рынку «Салют».
Пенсіянер з Пружан прыйшоў на сустрэчу з дэпутатам, каб пацікавіцца, ці ёсць верагоднасць, што грашовыя ўклады савецкага перыяду будуць праіндэксаваны.
Інтарэсы жыхароў Шарашэва прадстаўляла мясцовая жыхарка. Пасялкоўцы занепакоены памяншэннем колькасці ложкаў у мясцовай бальніцы і аб‘ёмам аказання медыцынскай дапамогі. У прыватнасці, з больш як ста ложкаў тут засталося толькі 25, прычым пяць з іх — сацыяльныя. Нягледзячы на тлумачэнні аб сацыяльных стандартах, якія рэгулююцца на вышэйшым узроўні, і пра што расказаў прадстаўнік бальніцы, запрошаны на прыём, жанчына не засталася згодная: яна папрасіла ўсё-такі знайсці магчымасць, каб аднавіць функцыянаванне яшчэ хаця б некалькіх ложкаў. «Так, у Шарашэве і сельсавеце паменшылася колькасць насельніцтва, але ж не ў чатыры разы, як колькасць ложкаў?» — засяродзіла ўвагу жанчына. Акрамя таго, заяўніца ўзняла пытанне аб рамонце ўчастка дарогі ад Шарашэва да Купіч і неабходнасці дадатковага аўтобуснага прыпынку ў гарадскім пасёлку. Паводле слоў дырэктара ДРБУ-140 А.В. Суботы, з рамонтам давядзецца пачакаць да 2020 года, а вось пытанне з уладкаваннем прыпынку пачне вырашацца ў бліжэйшы час.
Марына ВАКУЛЬСКАЯ, фота аўтара.
