Бягучы год багаты на юбілейныя даты. Чарговая з іх — 85-годдзе ўз’яднання Заходняй Беларусі і БССР, якая святкавалася 17 верасня ў Дзень народнага адзінства.
На гэты раз свята прымаў гасцінны Кобрын, дзе пабывала прадстаўнічая дэлегацыя Пружанскага раёна на чале з намеснікам старшыні райвыканкама Русланам Супрыновічам. На цэнтральнай пешаходнай вуліцы раскінуліся павільёны з вырабамі майстроў-рамеснікаў, рукадзельнікаў, пчаляроў, працавалі і разнастайныя пляцоўкі, выставы, праводзіліся конкурсы, віктарыны.
Свята пачалося з ускладання вянка і кветак да помніка загінуўшым воінам. Аддаць даніну памяці прыйшлі кіраўнікі вобласці, раёна, прадстаўнікі іншых раёнаў Брэстчыны, грамадскіх арганізацый і аб’яднанняў, светары каталіцкай і праваслаўнай канфесій.
У гарадскім Доме культуры адбыўся святочны канцэрт майстроў абласной самадзейнасці. З уступным словам да прысутных звярнуўся першы намеснік старшыні Брэсцкага аблвыканкама Дзмітрый Гарадзецкі, які пажадаў міру, росквіту і дабрабыту народу роднай Беларусі.
Віктар Ільюшчанка. Фота аўтара