У мінулую нядзелю раённы парад Дзедаў Марозаў адкрыў сезон навагодніх гулянняў на Пружаншчыне.
Старт мерапрыемству далі каля музея-сядзібы «Пружанскі палацык», які з’яўляецца рэзідэнцыяй пружанскага Дзеда Мароза. Тут сабраліся навагоднія персанажы з усяго раёна: сваіх Снягурак і Дзедаў Марозаў — усяго каля пяцідзесяці пар — камандзіравалі ўстановы культуры і адукацыі. Дарэчы, многія праявілі ініцыятыву і прыехалі на свята са сваёй «світай».
На працягу ўсяго руху казачных герояў на чале з галоўным Дзедам Марозам горада па вуліцы Савецкай суправаджалі дзеці і дарослыя. І каго толькі не было ў гэтым шэсці! Акрамя Дзедаў Марозаў і Снягурак, да галоўнай ёлкі горада ішлі Кот у ботах і Зіма, Васілісы Прыгожыя і гарэза Маша з вядомага мульфільма, Львы і Ваўкі, Гномы і Зоркалік, Бабкі Ёжкі і Лешыя, і, канешне, сімвалы наступнага года Пеўнікі. Адны проста фатаграфавалі персанажаў у яркіх касцюмах, якія крочылі па галоўнай вуліцы горада, другія самі імкнуліся папазіраваць перад фотакамерамі побач з героямі свята.
Варта адзначыць, нягледзячы на холад і сырасць, і дзятвы, і дарослых, якія прыйшлі паназіраць за казачным дзействам, было нямала: казачную працэсію на гарадской плошчы чакала яшчэ нямала цікаўных. Там Дзед Мароз са сваёй вясёлай кампаніяй пацешыў пружанцаў забавамі, карагодамі, песнямі і танцамі. Самыя маленькія, якія найбольш вераць у цуды і сюрпрызы, дапамагалі Пушчавічку запаліць агеньчыкі на гарадской ёлцы, найбольш кемлівыя «лузгалі» загадкі ад Ворана і яго памочніц.
Па традыцыі напярэдадні свята Дзедам Марозам і Снягуркай для маленькіх жыхароў горада і раёна быў аб’яўлены конкурс казак «Аднойчы ў навагоднюю ноч у Пружанах». Падчас святкавання былі названы імёны пераможцаў. На думку Дзеда Мароза, самыя лепшыя гісторыі расказалі Насця Пасько, Глеб Анісеня, Соня Казей і Каця Баран, якія атрымалі падарункі за свае старанні. Увогуле, як прызнаўся казачныя дзядуля, у сваёй паштовай скрыні сёлета ён знайшоў як ніколі многа лістоў. Некаторыя адпраўлялі не проста казачныя гісторыі, але і, карыстаючыся магчымасцю, дзяліліся патаемнымі жаданнямі. У адным з такіх лістоў Дзеда Мароза нават папрасілі, каб ён падарыў тату… час, які ён мог бы бавіць разам са сваёй дачкой.
На свяце малышоў, дарэчы, чакала не толькі забаўляльна-конкурсная праграма, але і палаткі з бяспройгрышнай латарэяй, вясёлыя каруселі, паездкі на паравозіку і розныя салодкасці. Ну, і, канешне, адкрыццё самага цікавага, вясёлага і чароўнага перыяду — часу ранішнікаў, святаў, узнагароджання адораных і таленавітых дзяцей «Дараванне-2016», якія абавязкова не абыдуцца без сюрпрызаў і падарункаў.
Марына Вакульская, Сяргей Талашкевіч (фота).