Четверг, 22 февраля 2024

Пружанскі раён намалаціў 100 тысяч тон! Віншаванні аграрыі прымалі ад старшыні аблвыканкама Юрыя Шулейкі

663

Кожнае лета на палетках раёна разварочваецца сапраўдная бітва за ўраджай. На жніве няма дробязяў і нюансаў, як няма і лішніх людзей. Толькі пры граматна арганізаванай рабоце збожжавая ніва аддзячвае сваёй шчодрасцю і высокімі намалотамі. Пружанскія аграрыі гэта выдатна ведаюць. Рубеж у 100 тысяч тон (дарэчы, наш раён упершыню перасягнуў яго роўна 45 гадоў таму, у 1977-м) — ужо добрая традыцыя і паказчык якасці. Сёлета запаветная лічба пакарылася хлебаробам 9 жніўня.

Ужо на наступны дзень работнікі сельскай гаспадаркі Пружаншчыны прымалі заслужаныя віншаванні.

Святочнае мерапрыемства з нагоды статысячнага намалоту на гэты раз разгарнулася непадалёк ад вёскі Росахі, на палях філіяла «Айчына» ААТ «Белавежскі». Гэта невыпадкова і вельмі сімвалічна, што падкрэсліў старшыня аблвыканкама Юрый Шулейка. Кіраўнік вобласці не мог не завітаць у наш раён. Ён падзякаваў хлебаробам за працу і ўзгадаў, што раней «Айчына» грымела на ўсю краіну, гаспадарка была вельмі магутнай. Вынікі своеасаблівага рэбрэндынгу, які адбыўся напачатку года, ужо навідавоку: павялічваюцца надоі, расце ўрджайнасць. Адметна, што самы першы перадавік-«тысячнік» жніва-2022 у раёне — вадзіцель Васілій Півень — менавіта з «Айчыны». А літаральна за пару гадзін да свята сюды на дапамогу ва ўборцы ўраджаю прыехалі 25 камбайнаў з аддзяленняў Мінкавічы, Расна, Каралін і Навасёлкі ААТ «Белавежскі» Камянецкага раёна. Што і казаць, гаспадарка пад надзейным крылом, а самае галоўнае, яе работнікі гатовы шчыра працаваць і павялічваць паказчыкі.

— Думаю, што да статысячнага намалоту мы дадамо яшчэ 30 працэнтаў. Такім чынам, па папярэдніх падліках, Пружаншчына сёлета павінна атрымаць каля 135 тысяч тон ураджаю: прыкладна 10 працэнтаў ад агульнаабласнога караваю. Увогуле, раён добра падрыхтаваны да жніва як матэрыяльна, так і тэхнічна. Таму і далей — мінімум прастояў і максімум намаганняў. Вы — гаспадары на гэтай зямлі, падыходзьце да справы з асаблівай адказнасцю, — сказаў Юрый Вітольдавіч.

Узгадаў губернатар і былога старшыню Пружанскага райвыканкама Юрыя Бісуна, пад кіраўніцтвам якога праходзіла мінулагодняя сяўба азімых, пачатак веснавых работ і, фактычна, закладваўся ўраджай-2022. Юрый Шулейка прызнаўся: да назначэння ў раён новага кіраўніка падыходзіў вельмі адказна. Вельмі хацеў, каб Пружаншчына гарманічна развівалася, а рабіць гэта намнога прасцей разам з добра знаёмым чалавекам, з земляком. Таксама губернатар перадаў словы падзякі Прэзідэнта Беларусі Аляксандра Лукашэнкі ў адрас працаўнікоў Брэстчыны.

У сваю чаргу, старшыня райвыканкама Міхаіл Грышкевіч падкрэсліў, што вельмі рады за родны раён і ўдзячны людзям. Міхаілу Міхайлавічу была ўручана падзяка ад Юрыя Шулейкі, а яшчэ прыгожы каравай — сімвал запаветнага рубяжа ў 100 тысяч тон.

— Жніво — гэта экзамен, да якога мы рыхтуемся цэлы год. Гэта галоўны экзамен — сабраць хлеб, каб краіна квітнела і людзі жылі ў дастатку. Дзякуй кіраўнікам, спецыялістам, работнікам. Асобная падзяка механізатарам і вадзіцелям. Нам засталося ўбраць прыкладна чвэрць ураджаю. І мы справімся. Усім здароўя і дабрабыту, — такімі цёплымі словамі і пажаданнямі вітаў усіх Міхаіл Грышкевіч.

Прыбыў на палетак, каб раздзяліць радасную падзею з працаўнікамі Пружаншчыны, выканаўчы дырэктар абласнога аграпрамысловага саюза Сяргей Ашмянцаў. Як адзначыў Сяргей Дзмітрыевіч, пружанцы заўсёды робяць важкі ўнёсак у каравай Брэстчыны. Так адбылося і сёлета.

— Успамінаю 2002-гі, калі ў раён прыязджаў Кіраўнік дзяржавы. Канечне, паказчыкі тады былі куды больш сціплымі. Прыемна, што яны ўвесь час растуць. Спадзяюся, што хутка мы будзем святкаваць разам 150-тысячны, а то і яшчэ большы намалот. Усім цярпення і вытрымкі! — звярнуўся да хлебаробаў, кіраўнікоў гаспадарак, прафсаюзных актывістаў і ўсіх гасцей Сяргей Ашмянцаў. Затым уручыў старшыні райвыканкама Міхаілу Грышкевічу падзячны ліст і традыцыйны салодкі падарунак з зерня новага ўраджаю.

Што яшчэ было падчас свята? Зразумела, цудоўныя песні. Добра знаёмыя з дзяцінства кампазіцыі выканалі салісткі вакальнага гурта «Забава» аўтаклуба. Яны дакладна падарылі добры настрой механізатарам і іх памочнікам.

А апошніх ужо чакалі магутныя «караблі палёў», якія на час свята ўзялі зусім кароценькую паўзу і роўненькай лініяй выстраіліся на палетку. Дарэчы, ён быў убраны толькі часткова. Таму адразу пасля завяршэння мерапрыемства і кароткай размовы губернатара з кіраўнікамі гаспадарак, падчас якой Юрый Шулейка ў чарговы раз заклікаў вельмі адказна падыходзіць да справы, камбайны «паплылі» па полі. «Паплылі» па новыя намалоты і выдатныя вынікі, якія абавязкова стануць залогам харчовай бяспекі і перанясуцца на нашыя сталы духмянымі і такімі смачнымі боханамі хлеба.

Уладзіслаў Шпарла. Фота аўтара

Альбомы прама з поля тут: https://vk.com/album-23306785_285580569 і https://ok.ru/budni/album/945165102728