Суббота, 13 апреля 2024

Прэзідэнт Беларусі агучыў прапановы па супрацоўніцтве ў ШАС. Поўная прамова Лукашэнкі на саміце

19

Выступленне Прэзідэнта Беларусі Лукашэнкі А.Р. на пасяджэнні Савета кіраўнікоў дзяржаў Шанхайскай арганізацыі супрацоўніцтва ў фармаце відэаканферэнцыі

Паважаны спадар Модзі (прэм’ер-міністр Індыі Нарэндра Модзі. — Заўвага БЕЛТА)!

Паважаныя сябры!

Дазвольце ад імя беларускага народа прывітаць удзельнікаў Савета кіраўнікоў дзяржаў Шанхайскай арганізацыі супрацоўніцтва.

Спадзяюся, што наступнае пасяджэнне мы зможам правесці ў вочным фармаце. Нібыта і пандэмія скончылася.

Упэўнены, з прыходам у ШАС такой магутнай дзяржавы з вельмі багатай гісторыяй і культурай, як Ісламская Рэспубліка Іран, і новых партнёраў па дыялогу — Аб’яднаных Арабскіх Эміратаў, Кувейта, М’янмы, Мальдыўскай Рэспублікі — мы станем яшчэ больш з’яднанымі і эфектыўнымі.

Перакананы, пры падтрымцы ўсіх краін-членаў Беларусь у бліжэйшы час таксама далучыцца ў якасці паўнапраўнага ўдзельніка да Шанхайскай арганізацыі супрацоўніцтва. Мы адпаведную работу правялі і ўдзячныя тым, хто нас у гэтым падтрымлівае.

Тэма нашага саміту — «На шляху да бяспечнага ШАС». Яна вельмі актуальная ва ўмовах крызісу міжнародных адносін, які паглыбляецца.

Трэба прызнаць, ранейшая сістэма бяспекі не была ідэальнай, але тым не менш прадугледжвала механізмы стрымліванняў і проціваг, абавязковасць выканання норм міжнароднага права.

Сёння ж мы бачым поўны злом усіх правіл і паняццяў. Таму нядзіўна, што ШАС вымушана яшчэ больш сфакусіравацца не на пытаннях эканомікі, а на праблемах бяспекі і стабільнасці ў рэгіёне.

Цвёрда адстойваючы прынцыпы пабудовы справядлівага свету для ўсіх без выключэння дзяржаў, Мінск на розных міжнародных пляцоўках пастаянна праводзіць работу па пошуку кампрамісных рашэнняў і развязак.

Карыстаючыся магчымасцю, хацеў бы закрануць шэраг актуальных напрамкаў нашага ўзаемадзеяння.

Першае. Усё больш злабадзённымі з’яўляюцца для краін — удзельніц арганізацыі такія выклікі і пагрозы, як дэструктыўныя кібератакі, крадзеж лічбавых даных, мэтанакіраванае распаўсюджванне фэйкаў у інфармацыйнай прасторы. Пра гэта ўжо гаварылі выступоўцы.

Гатовы да супрацоўніцтва па гэтым напрамку, уключаючы абучэнне спецыялістаў, рэалізацыю сумесных праектаў па кібервучэннях, узаемны абмен тэхнічнымі рашэннямі.

Другое. Захад, чапляючыся за дамінаванне ў шэрагу сфер эканомікі і фінансаў, спрабуе стрымаць развіццё непажаданых яму краін і ўводзіць супраць іх незаконныя варварскія санкцыі.

Каб гэтаму эфектыўна процістаяць, Беларусь актыўна пашырае ідэю глабальнага развіцця. Паслядоўна выступаем як за стварэнне вялікага Еўразійскага партнёрства з краінамі, з якімі ў нас ужо склаліся цесныя адносіны — Кітайскай Народнай Рэспублікай, Індыяй, Пакістанам, Іранам, нашымі партнёрамі СНД, — так і за спалучэнне фарматаў Еўразійскага эканамічнага саюза, ШАС і БРІКС у шырокім кантэксце.

Трэцяе. Важны складнік пастаяннага тэхналагічнага развіцця — гэта абмен вопытам і назапашанымі ведамі.

У якасці аднаго з магчымых пілотных праектаў на платформе ШАС прапануем падрыхтаваць праграму аб’яднання інфармацыйных рэсурсаў цэнтраў трансферу тэхналогій. Так мы зможам стымуляваць працэсы пашырэння і камерцыялізацыі навукова-тэхнічных праектаў.

Чацвёртае. Ва ўмовах абвастрэння праблем глабальнай харчовай бяспекі дзяржавы ШАС могуць разлічваць на магчымасці Беларусі як аднаго з буйнейшых экспарцёраў мінеральных угнаенняў, сельскагаспадарчай прадукцыі, прадуктаў харчавання і тэхнікі.

Для фінансавага суправаджэння гандлёвых кантрактаў і рэалізацыі розных праектаў Беларусь цалкам падтрымлівае ідэю прапрацоўкі ініцыятывы стварэння Банка развіцця ШАС. Дарэчы, да гэтай праблемы мы ўжо звярталіся ў свой час.

Пятае. Мінск захоўвае зацікаўленасць у трансфармацыі агульнай транспартна-лагістычнай прасторы ШАС, у тым ліку шляхам актывізацыі міжнародных перавозак, паскарэння і лічбавізацыі працэдур кантролю, развіцця і эксплуатацыі транспартнага калідора Поўнач — Поўдзень.

Шостае. Для больш блізкага знаёмства з разнастайнасцю культур нашай арганізацыі прапануем разгледзець магчымасць рэалізацыі маштабнага сумеснага праекта — Фестывалю культур ШАС, зрабіўшы яго традыцыйным.

Сёмае. Усе нашы планы рызыкуюць застацца на паперы, калі не ўзмоцнім работу з падрастаючым пакаленнем. Многае з таго, што мы цяпер абмяркоўваем, будуць рэалізоўваць сённяшнія студэнты. Трэба падумаць над стварэннем платформы «ШАС для моладзі».

Завяршаючы сваё выступленне, хачу павіншаваць Астану з прыняццем старшынства ў Шанхайскай арганізацыі супрацоўніцтва.

Не сумняваюся, што пад старшынствам Казахстана ШАС атрымае новы імпульс у сваім развіцці.

Дзякую вам за ўвагу.