Среда, 21 февраля 2024

Праект «Бацькаўшчына»: Дом афіцэраў, ён жа — клуб «Космас»

462

Вуліца Рыгора Шырмы (яна ж Камуністычная, яна ж Дамброўскага, яна ж Аляксандраўская) сучасны выгляд набывала ўжо пасля вайны: у 1944-м гэтая частка Пружан поўнасцю згарэла.

У першай палове 50-х пачалося будаўніцтва двухпавярховак насупраць саборнай царквы. Школу №2 — цяперашнюю гімназію — пабудавалі ў 1962-м, некалькімі гадамі пазней адзін за адным з‘явіліся кінатэатр «Спадарожнік», жылыя шматпавярхоўкі, Дом Саветаў і гасцініца…

А вось гэты будынак, дзе сёння размяшчаюцца спецыялізаваная дзіцяча-юнацкая школа алімпійскага рэзерву і дзіцячая бібліятэка імя Алены Лось, узводзіўся вайскоўцамі як Дом афіцэраў, так званы клуб «Космас». Побач і насупраць размясціліся «ваенныя» дамы — ДАСы, будынак штаба дывізіі, дзе цяпер знаходзіцца школа мастацтваў імя Р.Р.Шырмы. А на новую плошчу (у юбілейным 1970-м годзе, які пазначаны на плакаце, помнік Леніну яшчэ не быў пабудаваны) перанеслася правядзенне святочных дэманстрацый і парадаў.

Вядучая рубрыкі Ірына Сядова