Напрыканцы мінулага тыдня былі падведзены вынікі шматдзённага турніру па шахматах і шашках памяці Аляксандра Мікалаевіча Чавусава.
Адзначым, што некалькі гадоў з-за неспрыяльнай па каранавірусе абстаноўцы турнір не праводзіўся. У гэтым годзе баталіі на шахматна-шашачных дошках аднавіліся.
Хто ж такі Аляксандр Чавусаў і чаму менавіта ў яго памяць праводзіўся турнір?
Як расказала нам Вера Шурына, якая даволі працяглы час працавала з Аляксандрам Мікалаевічам у КУВП «Камунальнік», гэта быў вельмі светлы, яскравы чалавек, добры сем’янін, муж, бацька і сябар. Ён заўсёды імкнуўся прыйсці і заўсёды прыходзіў на дапамогу. Выдатны шахматыст, які неаднойчы перамагаў не толькі ў раённых, але і абласных турнірах, ездзіў абараняць спартыўную доблесць Брэстчыны на рэспубліканскія спаборніцтвы. Яго фатаграфія змешчана на Дошцы гонару лепшых шахматыстаў у Брэсцкім шахматна-шашачным клубе. На жаль, у кастрычніку гэтага года Аляксандр Мікалаевіч пайшоў з жыцця. Да 64 гадоў ён не дажыў зусім крыху. Аляксандр Чавусаў аб’ядноўваў вакол сябе аматараў шахмат і шашак. Яго імя назаўсёды застанецца ў памяці нашых пружанцаў.
Да турніру сябар Аляксандра Чавусава Анатолій Неміровіч, які заняў прызавое месца па шашках, напісаў такія вершаваныя радкі:
«Нам повезло, что был ты с нами
На протяженьи многих лет.
Своими добрыми делами
Оставил в душах наших след!
Был спорту предан горячо.
И людям в трудные моменты
Ты подставлял своё плечо.
С надеждой планы свои строил,
Ещё не думал на покой,
Но вдруг… октябрьскою порою
Ты завершил свой путь земной.
Мы будем за тебя молиться –
Всё то, чем можем мы помочь,
Чтобы твою покаянную душу
На небеса принял Господь.
Прости всех нас – земных и грешных,
Прости ты матушке-судьбе…
А мы, пока живём на свете,
Все будем помнить о тебе!
И вот сегодня, в этот час
Тебе мы шлём благую весть,
Чтобы азарт спортивный не угас,
Турнир проводим в твою честь!»
Пагадзіцеся, добрыя словы. А турнір будзе своеасаблівым помнікам у гонар цудоўнага Чалавека.
Пасля шматдзённых баталій былі падведзены вынікі турніру.
У шахматах месцы размеркаваліся наступным чынам: трэцяе заняў Мікалай Баран, другое – Васіль Ліцкевіч і першае – Міхаіл Грыцэвіч. Сярод прызёраў па шашках на трэцім месцы Сяргей Наумчык, на другім – Анатолій Неміровіч, на першым – Міхаіл Цымбаліст.
Падводзячы вынікі турніру, дырэктар раённага фізкультурна-спартыўнага клуба «Мухавец» Вікторыя Шаманава павіншавала пераможцаў і выказала спадзяванне на тое, што спаборніцтва, у якога адкрылася другое дыханне, будзе праводзіцца і надалей. Яна ўручыла граматы прызёрам. Свае дыпломы ўручыў і я як галоўны рэдактар газеты «Раённыя будні». Наша рэдакцыя падрыхтавала і прызы для пераможцаў: за першыя месцы прадугледжана падпіска на газету на паўгоддзе, за другія – на квартал і за трэція – на месяц. Спецыяльным прызам за актыўны ўдзел у турніры быў узнагароджаны самы старэйшы ўдзельнік Уладзімір Ільіч Чакашоў.
Віктар Ільюшчанка. Фота аўтара