Понедельник, 17 июня 2024

Падрыхтоўка важных мерапрыемстваў і кадры. Лукашэнка прыняў з дакладам першага намесніка кіраўніка Адміністрацыі Прэзідэнта

63

Прэзідэнт Беларусі Аляксандр Лукашэнка прыняў з дакладам першага намесніка кіраўніка Адміністрацыі Прэзідэнта Максіма Рыжанкова. У ліку тэм для абмеркавання кіраўнік дзяржавы абазначыў арганізацыйную работу па падрыхтоўцы да пасяджэння Усебеларускага народнага сходу, правядзенні важных для краіны мерапрыемстваў на прэзідэнцкім узроўні, кадравыя пытанні, перадае карэспандэнт БЕЛТА.

«Цяпер шмат арганізацыйных мерапрыемстваў у нас. І Адміністрацыі Прэзідэнта як ніколі складана. Трэба перш за ўсё арганізаваць работу галін улады. Асабліва Усебеларускага народнага сходу. Шмат новага», — сказаў кіраўнік дзяржавы.

Прэзідэнт адзначыў, што фактычна пачынае ўжо работу парламент новага склікання, гэта работа вядзецца ў планавым парадку. У Савеце Рэспублікі яшчэ трэба будзе правесці першае пасяджэнне, а Палата прадстаўнікоў новага склікання пачала ўжо сваю работу — там сфарміраваны пастаянныя камісіі, выбраны іх кіраўнікі.
«Галоўнае цяпер — УНС. І тыя мерапрыемствы важныя, якія мы павінны правесці на ўзроўні Прэзідэнта ў бліжэйшы час», — падкрэсліў Аляксандр Лукашэнка.

Ён таксама звярнуў асаблівую ўвагу на работу ў кадравай сферы, таму што з кадравага рэестра Прэзідэнта шмат людзей былі выбраны ў парламент і патрэбна адпаведная замена.

Перад Адміністрацыяй Прэзідэнта стаіць задача перш за ўсё арганізаваць работу па абазначаным комплексе пытанняў, размеркаваўшы непасрэдна тым, хто павінен іх вырашаць, а таксама пракантраляваць гэты працэс.

Аляксандр Лукашэнка ў цэлым падкрэсліў, што гэты год для краіны няпросты і работы будзе шмат. Наперадзе ў тым ліку шмат важных святочных дат, у тым ліку Дзень Перамогі і Дзень Незалежнасці, калі краіна адзначыць 80-годдзе вызвалення ад нямецка-фашысцкіх захопнікаў.

БЕЛТА