Сустрэчы з супрацоўнікамі музея для вучняў СШ № 5 г.Пружаны ўжо сталі звыклымі: тут часта праходзяць экскурсіі, лекцыі. На гэты раз дзеці з прышкольнага лагера “Сонейка” наведалі музейна-педагагічны занятак.
Навуковы супрацоўнік музея Валянціна Пятроўна Нідзелька пазнаёміла дзяцей з гісторыяй лялек. Мы даведаліся, якімі былі самыя першыя лялькі, з чаго іх рабілі, з якой мэтай выкарыстоўвалі. Дзеці ўбачылі абрадавыя лялькі, лялькі — абярэгі. Цікавым было знаёмства з лялькамі — пандорамі – заканадаўцамі еўрапейскай моды 19 ст. Пачулі расказ і пра сучасныя калекцыі, выпуск лялек у нашы дні.
На занятку было шмат цікавай інфармацыі, дзеці з задавальненнем адказвалі на пытанні віктарыны. Напрыканцы нам было прапанавана творчае заданне — зрабіць даўно забытыя лялькі з паперы і стварыць для іх калекцыю адзення.
Соф‘я Кратко,
настаўніца пачатковых класаў СШ № 5 г.Пружаны.