Ліноўскі дзіцячы садок наведвае больш за 80 дзетак. Дзетсадаўскае жыццё вельмі разнастайнае, што падабаецца малым. Ёсць тут і гурток пад назвай «Умелыя ручкі».
Гурток раз на тыдзень наведваюць выхаванцы старэйшай групы, якім па 5-6 гадоў. І вучацца яны на занятках… ткаць. Так-так, як расказвае кіраўнік гуртка, педагог дадатковай адукацыі Лілія Шульга, мэта гуртка, які з’явіўся шэсць гадоў таму, — развіццё ў дзяцей творчых здольнасцей, звязаных з традыцыямі беларускага народа.
За непрацяглы час выхаванцы сумеснымі намаганнямі стварылі мноства выдатных работ, якія красуюцца на сценах на трэцім паверсе ўстановы.
Мы пабывалі на занятках і на свае вочы ўбачылі, з якім энтузіязмам займаюцца дзеці. Кожны хоча, каб яго работа заняла годнае месца ў «мясцовым музеі». Малыя з ахвотай дзяліліся меркаваннямі.
Ягор Басак:
— Ткаць мне вельмі падабаецца. У гуртку праходзяць мае любімыя заняткі. Таму хацеў бы займацца яшчэ часцей. Яшчэ мне падабаюцца заняткі ў басейне.
Аліса Меляшэвіч:
— Гурток па ткацтве вельмі цікавы. Мне падабаецца наша выкладчыца, Лілія Рыгораўна. Хацела б, каб заняткі былі часцей.
Алег Гардзіеўскі:
— Мне падабаюцца заняткі ў басейне і ў гуртку па ткацтве. Але ткаць падабаецца больш.
Руслан Басак
Фота Кацярыны Масік