Суббота, 13 апреля 2024

Не «Чабурашкам» адзіным: кінатэатр «Спадарожнік» ідзе ў нагу з часам і запрашае пружанцаў акунуцца ў свет кіно

453

Магчымасць апынуцца разам з героямі ў неверагодных прыгодах, неблагі варыянт правесці вольны час дае нам кіно. Цудоўна, што цікавае і карыснае баўленне часу можна лёгка раздзяліць з сям’ёй і сябрамі, і пры гэтым не выязджаць за межы роднага горада, бо добрае абслугоўванне, разнастайныя кінастужкі, вялікі экран і якасны гук прапануе кінатэатр «Спадарожнік».

Дырэктар кінатэатра Таццяна Ланінская.

Як расказвае дырэктар кінатэатра Таццяна Ланінская, згодна з дадзенымі інтэрнэт-сервісу «Кінапошук», па выніках сямі тыдняў 2023 года першае месца ў рэйтынгу самых касавых і папулярных фільмаў упэўнена заняла сямейная кінастужка «Чабурашка». Ажыятаж адбыўся і ў Пружанах.

— Нарэшце, фільм «Чабурашка» рэжысёра Дзмітрыя Дзячэнкі вярнуў гледачоў у кінатэатры пасля пандэміі, — падзялілася назіраннямі Таццяна Уладзіміраўна. — Паглядзець на прыгоды мульцяшнага героя ў наш кінатэатр прыйшлі больш за 1,6 тыс. чалавек! Касавыя зборы ў студзені склалі больш за 11,3 тыс. руб. Сітуацыя выключная, бо за апошнія пяць год не было такога, каб зборы за адзін месяц былі эквівалентны паўгадавой выручцы за мінулы год.

«Чабурашка» не згубіў папулярнасці і ў другі, і ў трэці тыдні пракату. Напрыклад, 15 студзеня ўсе 254 месцы ў вялікай зале кінатэатра былі раскуплены. Увогуле, па просьбах гледачоў паказ камедыйнай гісторыі працягнулі да 22 лютага.

Касір Жанна Зейрук.

Дарэчы, «Спадарожнік» дзеліцца яшчэ адной цудоўнай навіной: цяпер аматары кіно могуць расплачвацца за квіткі не толькі наяўнымі грашыма, але і банкаўскай карткай. Менавіта «Чабурашка» «дапамог» набыць тэрмінал, адсутнасць якога была нязручнай і для гледачоў, і для работнікаў кінатэатра.

Ініцыятыва такой пакупкі, зразумела, належала дырэктару. З верасня Таццяна Ланінская ўзначальвае кінатэатр. Калектыў адзначае, што новы кіраўнік імкнецца ісці ў нагу з часам.

— У нас шмат перамен у добры бок. Вось маленькі прыклад: да Дня ўсіх закаханых Таццяна Уладзіміраўна прапанавала ўпрыгожыць кінатэатр. Мы павесілі паветраныя шарыкі, і адразу з’явіўся святочны настрой. Здаецца, такая дробязь, а прыемна ўсім! — кажа касір Жанна Зейрук.

Сама Жанна Уладзіміраўна працуе ў «Спадарожніку» ўжо 33 гады. Пачынала кінамеханікам, абслугоўвала 35-міліметровы кінапраектар 23КПК, які зараз з’яўляецца амаль музейным экспанатам. Такая тэхніка выпускалася ленінградскім аб’яднаннем «ЛОМА» з 1973 года. Дарэчы, у кожнага жадаючага ёсць магчымасць увачавідкі паглядзець на рарытэтную рэч: праектар 23КПК цяпер выстаўлены ў фае кінатэатра «Спадарожнік».

— У апаратнай было тры такіх машыны: на двух мы працавалі, адна была рэзервовай, — расказвае Жанна Зейрук. — У металічных скрынях прыходзіла плёнка, якую трэба было праверыць, пераматаць на пачатак і заправіць. Нярэдка здараліся тэхнічныя казусы — рвалася плёнка. Нядзіўна: спачатку шлі паказы ў кінатэатрах вялікіх гарадоў, а пакуль прэм’еры давозілі да нас, плёнка зношвалася. Але гледачы былі цярпімымі, — усміхаецца жанчына. — Наогул, праца кінамеханіка была дастаткова няпростай. Гэта і вечна брудныя рукі, і бясконцы шум у апаратнай. Але паступова з’яўляліся сучасныя плёнкі, дыскі. Час імкліва бяжыць наперад, дзякуючы прагрэсу працаваць стала лягчэй, цяпер у кінатэатры — лічбавае абсталяванне.

Работнікі кінатэатра імкнуцца зрабіць адпачынак людзей больш камфортным, ладзяць разнастайныя акцыі, прапануюць дадатковыя паслугі, раяць не забываць кінематаграфічную культуру і ветліва запрашаюць у госці. Падрабязнасці наконт асартыменту кінастужак, пачатку сеансаў, іх кошту вы можаце атрымаць па тэлефоне 3-59-08 і ў групе кінатэатра «УКантакце». Таксама кожную пятніцу мы дзелімся афішай кінатэатра ў нашым Telegram-канале.

Юлія Янушка. Фота Кацярыны Масік