Бадай, кожны імкнецца стварыць у сваёй асобна ўзятай кватэры, у сваім доме максімум камфорту і прыгажосці. Але калі паглядзець з іншага боку, то даволі часта здараецца, што за шырмай уласнай утульнасці ў жыцці мы не заўважаем таго, што адбываецца навокал.
Узяць для прыкладу наш горад Пружаны. Ён вельмі прыгожы, а вось падтрымліваць яго выгляд — справа складаная і затратная. Гэта могуць з упэўненасцю пацвердзіць і работнікі КУВП «Камунальнік». Напрыклад, дзяўчаты з участка «Азеляненне» нямала сіл прыкладаюць, каб высадзіць вясной і летам кветкавую прыгажосць на клумбах, дагледзець зялёныя насаджэнні. Але часцяком наша абыякавасць, некультурнасць у адносінах да агульнага псуюць прыгожую карціну горада, прымушаюць іншых людзей збіраць за намі смецце, аднаўляць паламаныя платы і лавачкі, дасаджваць туйкі і кветкі замест украдзеных. Неяк крыўдна за тых, хто адчувае сябе госцем на роднай зямлі, ды яшчэ госцем нахабным, які абвінавачвае гаспадароў у тым, што недастаткова хутка памылі забруджаную ім падлогу…
Тым не менш, сапраўдныя гаспадары таксама ёсць. Хаця часам мы бачым толькі вынікі іх працы, а не іх саміх. Усім падабаецца, калі трава на газонах і дваровых тэрыторыях у раённым цэнтры і іншых населеных пунктах своечасова скошана і прыбрана. Сапраўдная прыгажосць! Роўненька, чыста. Але ці часта мы дзякуем тым, хто працуе з трымерамі, на газонакасілках? Праца не з лёгкіх, калі яшчэ ўзяць +30 градусаў у цяньку. Ды і тэрыторыя для абкошвання не малая.
Дарэчы, менавіта для таго, каб яшчэ аператыўней і якасней спраўляцца з абкошваннем горада, нядаўна КУВП «Камунальнік» набыло газонакасілку «ГРЫНМАН» кітайскай вытворчасці за 27 тыс. беларускіх рублёў. На выбар вытворцы паўплываў кошт агрэгата і, як ні дзіўна, санкцыі. З-за іх «Хускварну» ці «Штыль» купіць вельмі складана, ды і запчасткі знайсці немагчыма. А кітайская газонакасілка нічым не саступае сваім аналагам. Не хоча Захад з намі супрацоўнічаць, што ж, знойдзем тых, хто жадае сябраваць.
Гэта першы ў раёне падобны агрэгат. На дадзены момант такімі могуць пахваліцца толькі ў Брэсце і Кобрыне. Шырыня кашэння ў касілкі — 152 сантыметры. З асаблівасцей трэба назваць нулявы радыус развароту — можа развярнуцца на месцы. Таксама ёсць пад сядзеннем датчык прысутнасці: калі вадзіцель пакідае сядзенне, рухавік і нажы аўтаматычна выключацца.
Газонакасілка прайшла абкатку ў горадзе і цяпер будзе працаваць у Ружанах, наводзіць прыгажосць у пасёлку да свята «Ружанская брама».
Вадзім Раўнейка. Фота Кацярыны Масік