Прэзідэнт Беларусі Аляксандр Лукашэнка пацвердзіў гатоўнасць да цеснага супрацоўніцтва з Зімбабвэ. Аб гэтым ён заявіў на сустрэчы з міністрам замежных спраў і міжнароднага гандлю Зімбабвэ Фрэдэрыкам Шавам, перадае карэспандэнт БЕЛТА.
«Вельмі добра, што мы вытрымліваем нашы дамоўленасці, і вы сёння знаходзіцеся ў Беларусі з дзелавым візітам. Я яшчэ раз хачу пацвердзіць гатоўнасць Беларусі да цеснага супрацоўніцтва з вашай краінай. Мы намецілі спецыяльны план нашай работы з Зімбабвэ і строга гатовы прытрымлівацца рэалізацыі гэтых планаў і заданняў. У той жа час намеціліся некаторыя новыя напрамкі нашага супрацоўніцтва. Перш за ўсё ў гуманітарнай сферы. Я ўжо не гавару аб адукацыі. Мы са спадаром Мнангагвам дамовіліся, што ўдзелім вялікую ўвагу супрацоўніцтву ў сферы мацярынства, дзяцінства, аховы здароўя, дзіцячага харчавання. І я спадзяюся, што ў бліжэйшы час тут будзе жонка Прэзідэнта, якой даручана з боку Зімбабвэ займацца гэтым пытаннем. Вы павінны ведаць, што мы зробім максімальна магчымае для таго, каб аказаць тут дапамогу і падтрымку нашым сябрам у Зімбабвэ. Можаце на нас у гэтым плане разлічваць», — сказаў кіраўнік дзяржавы.
Што датычыцца гандлёва-эканамічных адносін, Аляксандр Лукашэнка адзначыў, што шляхі ў гэтым плане вядомыя. «Мы гатовы з вамі не проста абменьвацца таварамі. Мы гатовы ствараць сумесныя прадпрыемствы ў вас. Мы гатовы прыняць вашы інвестыцыі ў Беларусі, калі гэта вас будзе цікавіць. І на цывілізаванай высокай аснове выбудоўваць гэта супрацоўніцтва ў сферы эканомікі. Усе дамоўленасці, якіх мы дасягнулі ў час майго візіту ў вашу краіну, будуць няўхільна выконвацца», — запэўніў беларускі лідар.
Ён адзначыў, што паміж бакамі фактычна створана камісія на міждзяржаўным узроўні. З беларускага боку сітуацыю ў сферы ўзаемаадносін з Зімбабвэ кантралюе віцэ-прэм’ер Пётр Пархомчык. Таксама гэту краіну часта наведвае спецпасланнік Прэзідэнта Беларусі Віктар Шэйман. «Калі тэрмінова якія-небудзь пытанні ўзнікнуць, я праз яго буду інфармаваць і вас, і майго калегу — Прэзідэнта Зімбабвэ. Таму вы можаце разлічваць на нашы самыя добрыя і рашучыя адносіны з вашай краінай», — сказаў Аляксандр Лукашэнка.
Прэзідэнт нагадаў, што таксама намячаўся шэраг праграм па супрацоўніцтве на шматбаковай аснове з удзелам Беларусі, Зімбабвэ і іншых дзяржаў. «Калі ў вас будзе да гэтага цікавасць і ў гэтых краін будзе зацікаўленасць, мы зробім усё неабходнае для таго, каб супрацоўнічаць з вамі», — пацвердзіў кіраўнік дзяржавы.
Аляксандр Лукашэнка таксама адзначыў, што даволі падрабязна размаўляў і з Прэзідэнтам Расіі наконт сумеснага супрацоўніцтва з афрыканскімі дзяржавамі, перш за ўсё з Зімбабвэ, і атрымаў ад яго запэўненні ў вялікай зацікаўленасці да выбудоўвання такога эфектыўнага ўзаемадзеяння.
«Словам, усё, што я абяцаў Прэзідэнту (Зімбабвэ. — Заўвага БЕЛТА), я зрабіў і працягваю рабіць. І можаце на нас разлічваць», — сказаў кіраўнік дзяржавы.
Вітаючы госця, Аляксандр Лукашэнка адзначыў і цяперашняе снежнае надвор’е ў Беларусі: «Спадар міністр, як бачыце, вы своечасова прыехалі ў Беларусь. Нават можаце адчуць, што такое зіма ў Беларусі. Праўда, вельмі цёпла сёння. Але снег сапраўдны».
Фрэдэрык Шава ў сваю чаргу падзякаваў беларускаму лідару за запрашэнне ў краіну і магчымасць сустрэчы ў Палацы Незалежнасці, які зрабіў на яго прыемнае ўражанне. «Дазвольце таксама перадаць самыя цёплыя пажаданні ад вашага брата, Прэзідэнта Зімбабвэ Эмерсана Мнангагвы, — сказаў міністр замежных спраў і міжнароднага гандлю Зімбабвэ, маючы на ўвазе дружалюбныя адносіны паміж лідарамі дзвюх краін. — Ён перадае вам пажаданні моцнага здароўя і далейшага развіцця адносін паміж нашымі краінамі», — прадоўжыў Фрэдэрык Шава. Ён выказаў таксама словы ўдзячнасці ў адрас урада Беларусі і асабіста міністра замежных спраў Сяргея Алейніка за ветлівасць і цёплы прыём, аказаны дэлегацыі Зімбабвэ.