Прэзідэнт Беларусі Аляксандр Лукашэнка прыняў з дакладам міністра аховы здароўя Беларусі Дзмітрыя Піневіча. Абмяркоўваліся бягучы стан спраў у сістэме аховы здароўя, вытворчасць айчынных вакцын і лякарстваў, кадравае пытанне, удасканаленне матэрыяльна-тэхнічнай базы.
Аднак асобна варта вылучыць тэму забеспячэння якасным і даступным лячэннем усіх грамадзян краіны, незалежна ад рангаў і званняў. Аляксандр Лукашэнка ўсіх жорстка папярэдзіў і анансаваў раптоўныя праверкі бальніц. Тым не менш, пачаў сустрэчу Кіраўнік дзяржавы з пахвалы сістэмы аховы здароўя.
Справіліся з праблемай
За апошнія некалькі гадоў айчынныя медыцынскія работнікі і ўрачы сапраўды прайшлі вялікі шлях, на хаду прыстасоўваліся і вучыліся лячэнню новай для ўсяго свету інфекцыі. Прычым рабілі гэта не ва ўмовах лакдаўнаў і татальных закрыццяў.
«За кавід, вядома, дзякуй. Я ўжо не раз вяртаўся да гэтага пытання. Нагадаю: мая ўдзячнасць сістэме аховы здароўя і ўрачам не за тое, што яны лячылі, а за тое, што, не ведаючы, як лячыць, навучыліся. І сёння мы ўжо можам сказаць, што ніхто так у свеце не справіўся з гэтай праблемай, як гэта зроблена было ў Беларусі», – падкрэсліў беларускі лідар.
Пра якасць лячэння простых людзей
Адразу пасля агучанай пахвалы Аляксандр Лукашэнка акунуў удзельнікаў мерапрыемства ў рэальныя праблемы галіны.
«Я вас хачу папярэдзіць: у бліжэйшы час мною будзе створана мабільная група спецыялістаў, якія правераць і сістэму аховы зда-роўя, і выбарачна нечакана правераць бальніцы».
Кіраўнік дзяржавы ў сувязі з гэтым расказаў гісторыю пра жанчыну, якая першапачаткова трапіла ў бальніцу ў Шклоўскім раёне і знаходзілася пры смерці. Дзякуючы ўмяшанню Прэзідэнта, яе ўдалося выратаваць, і цяпер ужо яе жыццю нічога не пагражае.
У сувязі з гэтым Прэзідэнт звярнуў увагу на стан спраў у раённых бальніцах: «Я падумаў, Шклоўскі раён, я там бываю часта. Зразумела, калі Прэзідэнт наведвае нейкае месца, там і ахова здароўя, працуюць з рэзервамі і іншае… Калі там так, дык вось я тыдзень не сплю і думаю: а як жа ў іншых раённых бальніцах?».
Беларусь – дзяржава для народа! Калі нехта прызабыўся…
«Хачу вас усіх перасцерагчы, што літасці вам не будзе. І ніякае лячэнне вялікіх начальнікаў вас не выратуе. Разумейце мяне, як хочаце. Вось адзін у адзін, што я сказаў, сёння пачуе ўся краіна. І не толькі краіна. Да нас прыкаваны погляды шматлікіх дзяржаў. Мільёны людзей гэта пачуюць. І, калі ласка, зрабіце адпаведныя высновы. Паказваць актыўную дзейнасць, што мы вялікія, – нам гэта ў краіне не трэба. У нас дзяржава для народа. Дык і народ трэба лячыць», – сказаў беларускі лідар.
Ён падкрэсліў, што ў краіне для гэтага ўсё ёсць, каб лячыць нармальна, на патрэбным узроўні. «І кавід – сведчанне таго, што ў нас урачы добрыя, мы іх добра рыхтуем. Калі недзе ў ВНУ недапрацоўваем, то ў лячэбных установах настаўніцтва добра развіта. Я не хачу рабіць глыбока і далёка ідучыя вывады з гэтага выпадку, але штурхае да роздуму», – адзначыў Кіраўнік дзяржавы.
Пра актуальнае: рыхтавацца трэба да ўсяго
Сфера медыцыны – гэта не толькі лячэнне пацыентаў, але і важны складнік бяспекі краіны ў цэлым. І ў гэтым плане, асабліва з улікам цяперашніх рэалій у свеце, трэба быць гатовымі да ўсяго.
«Нядаўна мы абмяркоўвалі пытанні бяспекі нашай краіны. Гэта вельмі важна і актуальна. Задзейнічаны ўсе былі, у тым ліку і ахова зда-роўя. Ад медыцынскіх аптэчак да прывядзення ў нармальны стан лячэбных устаноў. Падключаемся і да ваенных медыкаў, а ваенныя да нас. Тут павінен быць вельмі інтэнсіўны абмен», – сказаў Прэзідэнт.
Пра эпідсітуацыю, айчынныя вакцыны і лякарствы, зарплаты
Прэзідэнт звярнуў увагу і на актуальную сёння тэму рэспіраторных інфекцый, тым больш што гэтыя працэсы праходзяць на фоне кавіду, які ўсё яшчэ цыркулюе, і на вытворчасць уласных вакцын.
Асобна Аляксандр Лукашэнка прапанаваў абмеркаваць тэму лекавага забеспячэння.
Асаблівую ўвагу Прэзідэнт удзяліў пытанню развіцця матэрыяльна-тэхнічнай базы як у ахове зда-роўя, так і адукацыі. У гэтым напрамку ўжо нямала зроблена за мінулыя гады – пабудаваны і аснашчаны неабходныя аб’екты. Цяпер трэба ўдзяліць прыярытэтную ўвагу зарплатам работнікаў і перастаць узводзіць «палацы», толькі кропкава скончыўшы мадэрнізацыю або будаўніцтва там, дзе засталося гэта зрабіць.
Што датычыцца зарплат медыцынскіх работнікаў, то ў гэтым напрамку па даручэнні Прэзідэнта ўжо рэалізаваны шэраг крокаў. Напрыклад, так званыя кавідныя надбаўкі пераклалі ў стандартную заработную плату. Аднак на гэтым спыняцца нельга.
У звязцы з папярэднім і кадравае пытанне. Прэзідэнт адзначыў, што апошнім часам вельмі павялічыўся працэнт падрыхтоўкі мэтавікоў.