У другі дзень афіцыйнага візіту Прэзідэнт Беларусі Аляксандр Лукашэнка з астраўнога сталічнага горада Малаба прыбыў на мацерыковую частку Экватарыяльнай Гвінеі, перадае карэспандэнт БЕЛТА.
Прэзідэнцкі борт прызямліўся ў аэрапорце горада Менгамеен. Аляксандра Лукашэнку ля трапа сустрэў Прэзідэнт краіны Тэадора Абіянг Нгема Мбасога. Ён запрасіў беларускага лідара паглядзець на новую сталіцу Экватарыяльнай Гвінеі — Сьюдад-дэ-ла-Пас, назва якога з іспанскай перакладаецца як Горад міру.
Па гатовых аб’ектах будучай сталіцы прэзідэнты вырашылі паехаць на адной машыне. У час праезду па будучай сталіцы Прэзідэнт Экватарыяльнай Гвінеі паказаў кіраўніку беларускай дзяржавы Афра-Амерыканскі ўніверсітэт Цэнтральнай Афрыкі, шпіталь «Ла Пас Аяла», Дом Урада. Размова лідараў краін прадоўжылася за нефармальным абедам.
Экватарыяльная Гвінея размешчана ў цэнтральнай частцы Афрыкі, на заходнім узбярэжжы мацерыка. Краіна складаецца з кантынентальнай часткі і астравоў у Гвінейскім заліве (агульная плошча — каля 28 тыс. кв.км, у тым ліку мацерыковай — 26 тыс. кв.км). На самым буйным востраве — Біёка — знаходзіцца сталіца — горад Малаба, куды Аляксандр Лукашэнка прыбыў напярэдадні і дзе вечарам 9 снежня адбыліся афіцыйныя перагаворы з Прэзідэнтам краіны Тэадора Абіянгам Нгемам Мбасога.
На перагаворах кіраўнік беларускай дзяржавы адзначыў, што гэта яго першы візіт у Цэнтральную Афрыку і ён уражаны ўбачаным у гэтай частцы цудоўнага Афрыканскага кантынента: «Прыгожыя лясы, горы, рэкі, багаты на рыбу Атлантычны акіян — сапраўды райскія скарбы».
«Як мне ўжо расказалі мае супрацоўнікі, на тэрыторыі, куды мы заўтра (размова пра другі дзень візіту — 10 снежня. — Заўвага БЕЛТА) з вамі паедзем або паляцім, там яшчэ цудоўней. Трэба зусім няшмат для таго, каб гэта быў сапраўды райскі куток. Хоць вы і так жывяце ў раі», — сказаў Аляксандр Лукашэнка пазней, падводзячы вынікі перагавораў.
Цяпер у Экватарыяльнай Гвінеі рэалізуецца праект па будаўніцтве новай сталіцы краіны, якая прызначана замяніць у гэтым статусе Малаба. Горад размешчаны на ўсходзе кантынентальнай часткі краіны і раней называўся Аяла, але ў 2020 годзе быў перайменаваны ў Сьюдад-дэ-ла-Пас. Ініцыятыва пераносу сталіцы належыць Прэзідэнту Экватарыяльнай Гвінеі. Прадугледжваецца, што новая сталіца будзе спалучаць новыя павевы ў архітэктуры і традыцыйныя культурныя элементы, пашыраць ідэнтычнасць горада. Чакаецца, што ў гарадской гаспадарцы вялікая роля будзе адведзена аднаўляльным крыніцам энергіі.