Прэзідэнт Беларусі Аляксандр Лукашэнка павіншаваў Прэзідэнта Чарнагорыі Міла Джуканавіча і грамадзян гэтай краіны з нацыянальным святам — Днём дзяржаўнасці. Аб гэтым БЕЛТА паведамілі ў прэс-службе беларускага лідара.
«Для кожнай краіны важна захаваць сваю ідэнтычнасць. Варта аберагаць тое каштоўнае, што трэба пакінуць нашчадкам: незалежнасць дзяржавы, яе традыцыі і самабытную культуру», — гаворыцца ў віншаванні.
Прэзідэнт адзначыў, што Беларусь зацікаўлена ў прадаўжэнні дыялогу з Чарнагорыяй на аснове ўзаемаразумення і павагі. «Упэўнены, што мы пераадолеем неспрыяльную палітычную кан’юнктуру, а добразычлівыя адносіны, дзелавыя і культурныя кантакты беларусаў і чарнагорцаў паслужаць надзейнай асновай для пашырэння плённага міждзяржаўнага супрацоўніцтва», — падкрэсліў беларускі лідар.
Аляксандр Лукашэнка пажадаў Міла Джуканавічу моцнага здароўя і поспехаў у адказнай дзейнасці, а чарнагорскаму народу — міру і дабрабыту.