Прэзідэнт Беларусі Аляксандр Лукашэнка на сустрэчы са старшынёй Савета Рэспублікі, упаўнаважаным прадстаўніком кіраўніка дзяржавы па горадзе Мінску Наталляй Качанавай і кіраўніком Адміністрацыі Прэзідэнта Ігарам Сергяенкам абмеркаваў тэму правядзення электаральнай кампаніі, ідэалагічныя і кадравыя пытанні, перадае карэспандэнт БЕЛТА.
У цэнтры ўвагі былі палітычныя пытанні, асноўнае з якіх — маючыя адбыцца выбары. «Мы ўступаем у электаральную кампанію. Яна будзе працяглай: і гэты, і наступны год, пачынаючы з мясцовых органаў улады, мясцовых Саветаў (выбары дэпутатаў мясцовых Саветаў розных узроўняў. — Заўвага БЕЛТА), Усебеларускі народны сход (новы ў нас напрамак) і заканчваючы прэзідэнцкімі выбарамі. З аднаго боку, мабілізацыя людзей і наша мабілізацыя. З іншага боку, вядома, трэба зрабіць так, каб не расхісталася краіна і грамадства, як гэта было раней», — звярнуў увагу кіраўнік дзяржавы.
У ліку тэм, якія закрануў Прэзідэнт, былі таксама кадравыя і ідэалагічныя пытанні. «Тут у нас таксама шмат праблем, шмат пытанняў. Неяк працуем, але пажадана, каб эфектыўнасць была вышэйшай», — заўважыў Аляксандр Лукашэнка.
Як паведамлялася БЕЛТА, у Беларусі ў 2024 годзе ўпершыню пройдзе адзіны дзень галасавання, які прадугледжаны ў абноўленай Канстытуцыі. Будзе не толькі фарміравацца склад парламента, але грамадзяне таксама выберуць дэпутатаў мясцовых Саветаў розных узроўняў. Прадугледжана, што адзіны дзень галасавання праводзіцца ў апошнюю нядзелю лютага. У 2024 годзе гэта 25 лютага.
Яшчэ адна асаблівасць — фарміраванне складу Усебеларускага народнага сходу, органа, які па выніках рэферэндуму набыў у Беларусі канстытуцыйны статус. У Канстытуцыі закладзена, што пасля адзінага дня галасавання не пазней як праз 60 дзён павінна адбыцца першае пасяджэнне Усебеларускага народнага сходу. Такім чынам, апошні магчымы дзень для пачатку работы пасяджэння УНС — 25 красавіка.