Шчыра мы заўжды працуем,
«Муравы» дабрабыт мацуем.
Нам кароўкі як радня,
Без нас не могуць жыць ні дня.
Пра каровак усё мы знаем,
Надоі ўвесь час падымаем.
Працуем мы старанна і з душою,
Каб малако цякло не ручаём — ракою.
Мы цялятак вельмі любім,
Даглядаем іх, галубім.
І яны нас прызнаюць,
Прывагі добрыя даюць.
Грошы мы лічыць умеем,
У эканоміцы ўсё разумеем.
Старанна кадры падбіраем,
Прэстыж гаспадаркі падымаем.
Дырэктар ААТ «Мурава» Пётр Білецкі:
— Кожны год падносіць нам дні, якіх мы з задавальненнем чакаем, якія прыносяць радасць, з якімі ў кожнага звязаны асабістыя надзеі. Гэта і дзяржаўныя святы, і рэлігійныя, і тыя ж дні нараджэння. Яны даюць нам магчымасць выказаць свае пачуцці, недзе стаць лепшымі. І вось калі гаварыць пра пачуцці, то для гэтага як мага лепш падыходзіць 8 Сакавіка – дзень самых жаданых, чароўных і абаяльных жанчын.
Свята, сапраўды, шчырае і светлае. Менавіта ў гэты дзень мы выказваем сваю любоў да тых, хто дорыць жыццё, прыносіць утульнасць у кожны дом, з’яўляецца памочніцай і дарадчыцай ва ўсіх справах і дае магчымасць нам, мужчынам, праяўляць ініцыятыву, паказваць сябе толькі з лепшага боку, дасягаць высокіх вяршынь ва ўсіх сферах дзейнасці.
А як нашаму сельгаставарыству абысціся без жанчын? Яны ў нас незаменныя працаўніцы, якія паказваюць прыклад стараннай работы на ўсіх участках дзейнасці нашага таварыства. Узяць жывёлагадоўлю. Ці змог бы мужчына з такой пяшчотай адносіцца да сваіх падапечных каровак, цялятак?
Думаю, толькі жанчына здольна так чуйна адносіцца да ўсяго жывога, бо ў ёй ад прыроды закладзена вялікае пачуццё адказнасці і адданасці той справе, якой яна займаецца. Адсюль і аддача, і прыбытак. А гэта ўжо немалаважны складнік для нашай гаспадаркі. Ды і з іншай работай жанчыны спраўляюцца на «выдатна», таму і давяраем ім складаныя і адказныя ўчасткі, у тым ліку і бухгалтэрыю, і падбор кадраў, і аналіз фінансава-гаспадарчай дзейнасці.
А яшчэ жанчына – гэта жонка, маці, бабуля. Як прыемна, калі цябе чакаюць дома, за цябе хвалююцца, калі ты ўпэўнены ў тым, што камусьці патрэбны. Шчасце – калі вяртаешся дадому, а там парадак, утульнасць і шчырая ўсмешка любімай жанчыны. А дзеці, іх выхаванне? Толькі падумаць, колькі сіл гэта адымае!
На жаль, не кожны дзень мы аддаём даніну павагі жанчыне за штодзённую руцінную працу, а часам яе наогул не заўважаем. Шкада. Вельмі хочацца, каб кожны мужчына стаў сапраўднай падтрымкай і апорай сваёй «палавінцы» і не толькі ў святочны дзень дарыў ласку, любоў, надзею, пяшчоту і, несумненна, кветкі.
Нашы самыя лепшыя, пяшчотныя, непаўторныя, мілыя жанчыны!
Са святам віншуем!
Здароўя жадаем!
Вас вельмі шануем!
Для вас — усё, што маем!
У шчасці жывіце
І гора не знайце.
Усмешкі дарыце,
Надзею давайце!
І ружы вам сёння
Ад нас, ад мужчын.
Ад шчырага сэрца:
Са святам жанчын!
Мужчынская палова дружнага калектыву ААТ «Мурава»
Вадзім Раўнейка. Фота Кацярыны Масік і з архіву рэдакцыі