У Шаняўскім сельскім клубе-бібліятэцы працуюць гурткі дэкаратыўна-прыкладнога мастацтва і сольных спеваў. Папулярнасцю карыстаюцца аматарскія аб’яднанні «Натхненне» і «Знаходка».
Ансамбль «Знаходка» атрымаў сваю назву невыпадкова. Кожны з яго ўдзельнікаў вельмі багаты на наватарскія знаходкі, ідэі і прапановы. Таму ў аб’яднання разнастайны рэпертуар. Артысты выконваюць як народныя песні, так і шансон, рускі рок 60-х гадоў, а таксама творы ўласнага сачынення.
Кіраўнік ансамбля Анатоль Гароднік мае за плячыма… толькі два класы музычнай школы. Спецыяльную адукацыю ў свой час атрымаць, на жаль, не ўдалося, але яму падуладныя многія музычныя інструменты: барабаны, гітара, клавішныя. І асвоены яны былі без дапамогі настаўнікаў — вось гэта сапраўдны талент!
— Кожную нядзелю сем членаў аб’яднання «Знаходка» збіраюцца ў клубе, каб заняцца любімай справай — памузіцыраваць. У гэтых людзей ёсць праца, сем’і, але ў свой выхадны іх разам збірае мастацтва, — адзначае загадчыца Шаняўскога СКБ Таццяна Кабрынец (якая, дарэчы, працуе ў сферы культуры 35 гадоў).
Юлія Янушка. Фота Кацярыны Масік