Наш горад не перастае прымяраць кветкавыя ўборы: сёлета афармленне клумбаў на пружанскіх уліцах вялося не толькі вясной, але працягваецца і летам. Цікавыя ідэі, як крэатыўна і арыгінальна ўпрыгожыць тэрыторыю на месцы пажоўклых на сонцы газонаў, падае ўчастак зялёнай гаспадаркі Пружанскага КУВП «Камунальнік».
Пра клумбу-кніжку, якая з‘явілася паблізу цэнтральнай раённай бібліятэкі, мы нядаўна пісалі. А цяпер на вуліцы Інтэрнацыянальнай — каля магазіна «Палявы» — з’явілася клумбавая кампазіцыя «Пружанскі млын».
Дарэчы, яна мае сваю перадгісторыю. Аказваецца, калектыў азеляніцеляў увасабляў у жыццё эскіз, распрацаваны майстрам участка М.М.Кандарэвіч, ужо ў другі раз. Работнікі «Камунальніка» ўпершыню рэалізавалі сваю задумку ў мінулым годзе ў Іванава, калі дапамагалі ўпрыгожыць гэты райцэнтр да сустрэчы гасцей абласных «Дажынак». Дарэчы, тады пружанцы занялі першае месца ў конкурсе фларыстычнага майстэрства сярод зялёных гаспадарак Брэстчыны.
Старанні Марыі Кандарэвіч у аздабленні роднага горада не засталіся незаўважанымі: нядаўна майстар участка зелянгаса была адзначана на пасяджэнні райвыканкама. Але Марыя Мікалаеўна сціпла зазначае, што прыгожыя і дагледжаныя клумбы — заслуга ўсяго калектыву.
— Над тым жа «Пружанскім млынам» працавалі больш дзясятка чалавек, — зазначае Марыя Мікалаеўна. — І ў сваю працу ўкладвалі душу.
Драўляны млын — справа рук сталяра Пятра Токара, устанаўліваў кампазіцыю, якую гарманічна дапоўнілі воз і снапы жыта, Алег Цёхан. Высаджвалі расаду (а гэта каля 1,5 тысячы штук пятунняў, сальвій, аксамітак, цынерарый і іншых відаў кветак і дэкаратыўных раслін) азеляняльнікі Наталля Пятравічэне, Любоў Велісевіч і Святлана Удавінец. Даглядае цяпер гэтую прыгажосць вадзіцель палівальнай машыны Яўген Стэпусь.
Паводле слоў Марыі Кандарэвіч, невялікі калектыў участка зелянгаса (усяго восем чалавек) штогод афармляе каля 3000 квадратных метраў клумбаў толькі па горадзе. За сезон, які сёлета ў азеляніцеляў пачаўся напрыканцы сакавіка, на вуліцах Пружан і шэрагу іншых населеных пунктаў высаджваецца каля 100 тысяч штук расады.
На жаль, большасць жыхароў раёна ды і многія арганізацыі не вельмі ахвотна ўдзельнічаюць ва ўпрыгожанні вуліц: згадзіцеся, агульнымі намаганнямі можна зрабіць яшчэ прыгажэйшы ўбор для роднага куточка.
На здымках: Марыя Кандарэвіч; ідуць работы па высаджванні кветак каля «Пружанскага млына».
Марына ВАКУЛЬСКАЯ,
Сяргей ТАЛАШКЕВІЧ (фота)