У мінулы аўторак у Пружанах была праведзена лёгкаатлетычная эстафета сярод вучнёўскай моладзі, прысвечаная Дню работнікаў фізічнай культуры і спорту.
На старт выйшлі прадстаўнікі ўсіх школ горада, гімназіі і Ружанскай СШ. У складзе кожнай каманды — пяць юнакоў і пяць дзяўчат.
Стартавала і фінішавала эстафета каля гарадскога Палаца культуры. Яе ўдзельнікі павінны былі пераадолець некалькі кіламетраў па вуліцах Савецкай, Чырвонаармейскай, Кастрычніцкай і Рыгора Шырмы.
Першай на фінішы была каманда СШ №3, але, паколькі яна парушыла палажэнне аб правядзенні эстафеты (адзін з удзельнікаў выступаў адразу на двух этапах), пераможцай была прызнана каманда СШ №5. За пераможцаў выступалі Дар’я Худалеева, Вольга Качанава, Дар’я Якута, Валерыя Покала, Лізавета Люсцібер, Аляксандр Жукоўскі, Максім Токар, Андрэй Астапчык, Дзмітрый Сіцянкоў, Мікалай Карпыза.
Другое месца дасталося навучэнцам гімназіі, трэцяе — СШ №1.
Каманда-пераможца ўзнагароджана кубкам, а таксама разам з прызёрамі спаборніцтваў граматамі аддзела адукацыі, спорту і турызму райвыканкама.
Мікола АРХУЦІК, Сяргей ТАЛАШКЕВІЧ (фота).