Прэзідэнт Беларусі Аляксандр Лукашэнка нацэльвае кіраўніцтва навуковай сферы на практыка-арыентаваныя тэмы. Аб гэтым ён заявіў на сустрэчы з беларускімі вучонымі, перадае карэспандэнт БЕЛТА.
«Каб мы больш увагі ўдзялялі практыка-арыентаваным тэмам. Тое, што сёння на злобу (дня. — Заўвага БЕЛТА). Тое, што патрэбна цяпер у нашым жыцці. Пачынаючы ад ваенных навук, бяспекі, заканчваючы мірным жыццём. У гэтым вялікі практычны сэнс», — сказаў кіраўнік дзяржавы.
Прэзідэнт звярнуў увагу, што па запатрабаваных напрамках навукі выдзяляюцца вялікія грошы, асабліва ў замежных краінах. Многія замежныя інвестары гатовы ўкладваць значныя фінансавыя сродкі ў розныя перспектыўныя распрацоўкі. «Усё сёння трэба, і ва ўсё гатовы інвесціраваць, вялікія грошы гатовы інвесціраваць. Але трэба паказаць тавар, паказаць яго эфектыўнасць і затым разгортваць вытворчасць», — сказаў беларускі лідар.
Дзейнічаць пры гэтым трэба аператыўна, падкрэсліў Аляксандр Лукашэнка. «Гэта момант. Маятнік хіснуўся ў ваш бок. І трэба скарыстоўваць гэты час, таму што заўтра будзе позна. Заўтра свет зноў супакоіцца і будзе спачываць на лаўрах, на тых дасягненнях, якія вы атрымалі на сённяшні момант. Ціха будзе, спакойна, вольна, усе будуць жыць, сыцець у нанова пераразмеркаваным свеце. Свет будзе іншы. Гэта ўжо ніхто сёння не аспрэчвае. Таму трэба скарыстацца момантам, — сказаў кіраўнік дзяржавы. — Скарыстаемся — будзе вынік. Гэта аснова нашай незалежнасці. Калі не будзе руху наперад, прытым руху хуткага, магутнага, — толку не будзе».