Суббота, 13 апреля 2024

Фотафакт. Вуліца Свабоды ў Пружанах стане свабоднай для праезду

623

Магчыма, добраўпарадкаванне вуліц вядзецца не такімі хуткімі тэмпамі, як хацелася б, але гэты працэс ідзе няспынна. І паступова, з году ў год выгляд нашых населеных пунктаў змяняецца ў лепшы бок.

Выраўноўванне ўкладзенага асфальту вядзе машыніст самаходнага катка Аляксандр Барташэвіч.

Сёлета дайшла чарга і да вуліцы Свабоды ў г.Пружаны. Працяглы час рух па ёй выклікаў нямала крытычных заўваг. Асабліва пакутавалі вадзіцелі ад высокіх або занадта заглыбленых калодзежных люкаў. Менавіта з выпраўлення гэтых хібаў і пачалося добраўпарадкаванне праезнай часткі. У дадатак, як зазначыў дырэктар КУВП «Камунальнік» Сяргей Бабрук, падчас падрыхтоўчага этапу была праведзена замена інжынернай інфраструктуры на шэрагу ўчасткаў, якія выклікалі сумненні адносна безаварыйнай работы. І толькі пасля заканчэння падобных работ дарожнікі ДЭУ-25 прыступілі да асфальтавання.

Як паведаміў начальнік дарожна-эксплуатацыйнага ўпраўлення №25 Уладзімір Пунько, новае асфальтавае пакрыццё робіцца па ўсёй даўжыні вуліцы. У выніку на 545 метрах будзе ўкладзена амаль 5 тысяч квадратных метраў цвёрдай сумесі, пасля чаго надыдзе чарга нанясення разметкі.

Работы пачаліся ў сярэдзіне чэрвеня і хутка будуць скончаны.

Так цяпер выглядае вуліца.

Дададзім, што на гэтае добраўпарадкаванне было выдзелена амаль 150 тысяч рублёў.

Алег Сідарэнка. Фота Кацярыны Масік