Дзе ўзяць мэтавае накіраванне на паступленне? На гэтае і многія іншыя пытанні сёлетніх выпускнікоў школ даў адказы кірмаш мэтавай падрыхтоўкі, які прайшоў на базе Палаца культуры.
Ён сабраў некалькі сотняў вучняў 9-11 класаў з усіх школ раёна. Падобнае мерапрыемства ладзілася ўпершыню ў Пружанах і выклікала даволі вялікую цікавасць. Як зазначыў намеснік старшыні райвыканкама Руслан Супрыновіч, звязана гэта з тым, што ў бягучым годзе змяніліся правілы ўступнай кампаніі і сёлетнім абітурыентам давядзецца прайсці сур’ёзныя выпрабаванні.
— Каб аказаць падтрымку ў прафесійным выбары — і парадай, і справай, — з пачатку года для школьнікаў праводзіцца маштабная прафарыентацыйная кампанія, — паведаміў Руслан Васільевіч. — Спачатку навучэнцы знаёміліся з умовамі працы на прадпрыемствах і ў арганізацыях раёна. У прыватнасці, з асаблівасцямі калектыўных дагавораў, у тым ліку з правамі і гарантыямі, якія даюць гэтыя пагадненні. Потым на базе аграрна-тэхнічнага каледжа быў праведзены своеасаблівы «круглы стол» з дзевяцікласнікамі, падчас якога абмяркоўваліся магчымасці іх далейшай прафесійнай адукацыі.
Падагульняючае мерапрыемства — кірмаш мэтавых накіраванняў, які, як падкрэсліў намеснік старшыні райвыканкама, абавязкова стане штогадовым. Магчымы дапаўненні ў змест, але з захаваннем таго фармату, што быў выбраны ў першы раз.
Кожны ўдзельнік кірмашу змог атрымаць максімальна пазнавальную інфармацыю. Пераважная частка прапаноў на гэты раз належала сельскагаспадарчым прадпрыемствам, што не дзіўна: большасць прамысловай эканомікі Пружаншчыны прыходзіцца менавіта на аграрны сектар. Гэтай галіне патрэбны працоўныя рукі, і, каб зацікавіць сваіх патэнцыяльных работнікаў, наймальнікі былі гатовы здзіўляць прапановамі. Інспектар па кадрах філіяла «Аграэнерга-Зеляневічы» Галіна Прэдка расказала, што арганізацыя прапануе чатыры мэтавыя накіраванні на атрыманне сярэдняй спецыяльнай і вышэйшай адукацыі ў галіне ветэрынарыі і заатэхніі.
Стымулюючыя даплаты да стыпендыі ў памеры 10-12 базавых велічынь штомесяц прапаноўвалі ў ААТ «Жураўлінае», адчувальныя грашовыя заахвочванні для маладых спецыялістаў — у ААТ «Шані-аграпрадукт».
Не менш прыцягальнымі былі прапановы і Брэсцкай абласной праектна-вышукальнай станцыі хімізацыі, райспажыўтаварыства. Патрэбны спецыялісты і раённаму цэнтру гігіены і эпідэміялогіі, мэтавыя накіраванні ад якога, як паведамляла інспектар па кадрах Святлана Босак, дазволяць сур’ёзна паменшыць прахадны бал на конкурсе залічэння. А яшчэ мэтавае накіраванне — гэта гарантыя працоўнага месца з атрыманнем жылля або выплат на найманне кватэры.
Жадаючых гатовы працаўладкаваць і Пружанскі лясгас, які, па словах намесніка дырэктара па ідэалагічнай рабоце Ірыны Раманюк, прапануе годную зарплату і вельмі цікавую працу.
Спецыялісты, якія прадстаўлялі свае арганізацыі, давалі разгорнутыя адказы на пытанні будучых выпускнікоў. Безумоўна, некаторыя з апошніх ужо вызначыліся з выбарам. Напрыклад, дзяўчаты з СШ №5, з якімі мы паразмаўлялі на кірмашы, ужо маюць уласныя планы. Аднак, як зазначылі школьніцы, яшчэ не позна падабраць лепшы варыянт. Актуальна гэта і для тых, хто яшчэ не вызначыўся са сваім далейшым шляхам. І звесткі, як кажуць, «з першых вуснаў» абавязкова дапамогуць знайсці аргументы «за» адносна той ці іншай прафесіі. Нашы суразмоўцы падкрэслілі: вельмі важна, што выбраная спецыяльнасць, дзякуючы мэтаваму накіраванню, застанецца запатрабаванай і праз 4-5 гадоў пасля навучання.
Алег Сідарэнка. Фота Кацярыны Масік