30 мая ва ўсіх 28 школах раёна прайшлі ўрачыстыя школьныя лінейкі з нагоды завяршэння чарговага навучальнага года.
На летнія канікулы адправіліся амаль 4868 хлопчыкаў і дзяўчынак. Хаця вучням 9 і 11 класаў пакуль рана гаварыць пра летні адпачынак: наперадзе школьныя іспыты, якія для выпускнікоў распачаліся ў суботу, першага чэрвеня.
Як паведаміла намеснік начальніка аддзела па адукацыі райвыканкама Святлана Супрыновіч, сёлета на Пружаншчыне базавую школу заканчваюць 433 вучні, і 21 з іх прэтэндуе на атрыманне пасведчання з адзнакай.
Яшчэ 310 чалавек атрымаюць атэстаты аб агульнай сярэдняй адукацыі. У тым ліку 10 выпускнікам давядзецца даказваць, што трываласць атрыманых імі за адзінаццаць гадоў вучобы ведаў варта «залатой пробы». Згодна з рэкамендацыямі Міністэрства адукацыі, назаўсёды яны развітаюцца з роднымі школамі восьмага чэрвеня.
Па традыцыі пабывалі на ўрачыстых лінейках і прадстаўнікі розных узроўняў улады, дэпутаты, члены працоўных калектываў і грамадскіх аб’яднанняў. Старшыня райвыканкама Юрый Бісун адрасаваў свае шчырыя віншаванні з нагоды завяршэння навучальнага года вучням і настаўнікам гімназіі.
Асобныя пажаданні Юрый Юр’евіч выказаў, вядома, выпускнікам, якіх за школьным парогам чакае новае, дарослае, поўнае адказнасці жыццё.
У шэрагу школ раёна адміністрацыі мясцовых гаспадарак падрыхтавалі выдатнікам вучобы, спартсменам і пераможцам разнастайных конкурсаў і алімпіяд каштоўныя падарункі.
А вядучая страхавая кампанія краіны «Белдзяржстрах» на гэты раз абрала адрасатамі сваёй увагі СШ №5 і Ружанскую СШ: гэтым навучальным установам уручылі сертыфікаты на набыццё аргтэхнікі.
На здымках: «апошні званок» для гімназістаў.
Марына Вакульская, Сяргей Талашкевіч (фота).