Менавіта на лета прыпадае пік гандлю агароднінай і садавіной, вырашчанымі на ўласных падворках, а таксама грыбамі і ягадамі, сабранымі ў лесе. Каб прадухіліць гандлёвую дзейнасць ва неўстаноўленых для гэтага месцах, спецыялісты Пружанскага раённага цэнтра гігіены і эпідэміялогіі, падатковай інспекцыі і аддзела эканомікі Пружанскага райвыканкама правялі прафілактычны рэйд па горадзе.
Ажыццяўляцца такі гандаль павінен на тэрыторыях рынкаў. Акрамя таго, некалькі гадоў таму дадаткова па просьбе насельніцтва былі ўладкаваны бясплатныя месцы гандлю для фізічных асоб па вул. 8 Сакавіка і па вул. Будаўнічай. Гэтыя пляцоўкі абсталяваны сталамі і лаўкамі пад навесам. Тут, дарэчы, амаль заўсёды ёсць пустыя месцы. Спецыялісты нагадалі: галоўнае — рабіць усё ў адпаведнасці з заканадаўствам, тады будзе парадак.
Як паказаў рэйд, у нашым горадзе нямала ахвочых прадаць уласна вырашчаныя агародніну і садавіну ці сабраныя ў лесе дары. Рэалізацыя такой прадукцыі ва неўстаноўленых месцах і без адпаведных дакументаў можа стаць нагодай для накладання штрафу ў памеры да трох базавых велічынь (у адпаведнасці з часткай 6 артыкула 13.11 Кодэкса Рэспублікі Беларусь аб адміністрацыйных правапарушэннях). Але падчас рэйду гэтая мера не прымянялася: спецыялісты правялі тлумачальную работу, уручылі інфармацыйныя памяткі.
Таксама раённы цэнтр гігіены і эпідэміялогіі нагадвае насельніцтву, што прадукцыя, якая рэалізуецца без дакументаў і, тым больш, у непрыстасаваных для гэтага месцах, можа стаць фактарам перадачы розных інфекцыйных захворванняў, выклікаць вірусныя інфекцыі, атручванні і батулізм.
Клапаціцеся пра сваю бяспеку!
Жыхары навакольных дамоў ужо даўно мараць пра ўладкаванне месца для продажу ў раёне дамоў № 4 і № 6 па вул. Вашкевіча. Пра гэта падчас рэйду расказалі нам жанчыны, якія вынеслі да гэтых дамоў на продаж садавіну са сваіх участкаў.
Аргументы даволі простыя: у асноўным, прадаўцы — гэта людзі сталага ўзросту, на Будаўнічую ім ісці далёка. А тут тэрыторыі дастаткова, каб уладкаваць сваё месца для гандлю. Тым больш, што ўчастак гэты дастаткова ажыўлены, людзі ідуць у бальніцу і назад з боку вул. Чырвонаармейскай і Юбілейнай. Ды і жыхарам мікрараёна зручна і выгадна купіць свежую прадукцыю з агарода. І самы галоўны аргумент: такі продаж — гэта няхай і маленькі, але прыемны дадатак да пенсіі. А яшчэ, кажуць пенсіянеркі, для іх гэта цудоўная магчымасць зносін з людзьмі.
Падрыхтавала Вольга Вадзяновіч. Фота аўтара