Четверг, 25 апреля 2024

Будзьце ўважлівымі на дарозе

173

У 2023 годзе ўстаноўлены 3374 факты ДТЗ з удзелам паляўнічых жывёл (+353 факты, +11,7% у параўнанні з 2022 годам), у выніку якіх загінула (траўміравана) 3439 паляўнічых жывёл (+359 асобін, +11,7%). Па краявіднай структуры ў большасці выпадкаў фіксаваліся факты гібелі ў выніку ДТЗ казулі — 2264 асобіны (272, 13,7%) і лася — 915 асобін (65, 7,7%). Найбольшая колькасць фактаў ДТЗ і загінуўшых жывёл адзначана ў маі (573 факты, або 17%, 576 загінуўшых жывёл, або 16,8%), найменшая — у лютым (175 фактаў, або 5,2%, 183 загінуўшыя жывёлы, або 5,3%).

Найбольш небяспечнымі ў адносінах да ДТЗ з удзелам паляўнічых жывёл у 2023 годзе з’яўляюцца рэспубліканскія аўтамабільныя дарогі: М-2, М-4, М-6, М-1 і М-5.

Вадзіцелям трэба памятаць, што дзікія жывёлы найбольш актыўныя ў цёмны час сутак, таму з надыходам змяркання трэба праяўляць павышаную пільнасць і выбіраць адпаведны хуткасны рэжым. Павышаную небяспеку ўяўляюць участкі аўтамабільных дарог з блізкаразмешчанай драўняна-хмызняковай расліннасцю.

Калі лось, алень, заяц ці іншы дзікі звер у начны час з‘яўляецца ў святле фар, ён аслеплены, цемра за межамі пучка святла ўспрымаецца ім як сцяна, і жывёла, як правіла, пачынае кідацца, не бачачы нічога, акрамя асветленага ўчастка дарогі і ўключаных фар. У такой сітуацыі рэкамендуецца спыніцца, выключыць святло фар (але пакінуць уключанымі габарытныя агні), уключыць аварыйную светлавую сігналізацыю, тым самым даць жывёле час адаптавацца да цемры і пакінуць дарогу.

Захаванне Правілаў дарожнага руху, у тым ліку ўстаноўленага хуткаснага рэжыму, прыняцце вадзіцелем адпаведных мер у зоне дзеяння папераджальнага знака «Дзікія жывёлы» дасць магчымасць пазбегнуць аварыйных сітуацый, звязаных з раптоўным з’яўленнем дзікіх жывёл на аўтамабільных дарогах.

Нагадваем, што ў выпадку выяўлення параненай, траўміраванай, хворай або загінуўшай паляўнічай жывёлы нарміруемага віду або дзікай жывёлы, якая адносіцца да віду, уключанага ў Чырвоную кнігу Рэспублікі Беларусь, асоба, якая выявіла такую жывёлу, павінна па магчымасці паведаміць аб гэтым карыстальніку паляўнічых угоддзяў або ў аператыўна-дзяжурную службу тэрытарыяльнага органа ўнутраных спраў.

Забараняецца самавольна здабываць, раскрыжоўваць або перамяшчаць (транспартаваць) тушы дзікіх жывёл або часткі туш, выкарыстоўваць прадукцыю (мяса, шкура, рогі і інш.). Парушэнне гэтага патрабавання цягне за сабой адміністрацыйную або крымінальную адказнасць.

Бярозаўская міжраённая інспекцыя аховы жывёльнага і расліннага свету просіць вас быць рацыянальнымі спажыўцамі прыродных рэсурсаў, не заставацца ўбаку і не быць абыякавымі да праблем захавання і прымнажэння прыродных багаццяў.

Калі вы маеце інфармацыю пра факты парушэння прыродаахоўнага заканадаўства, якія здзяйсняюцца ці рыхтуюцца, просім паведаміць пра гэта па тэлефоне даверу Бярозаўскай міжраённай інспекцыі аховы жывёльнага і расліннага свету (8 01643) 5-08-80.

Сяргей Окунцаў, начальнік Бярозаўскай міжраённай інспекцыі аховы жывёльнага і расліннага свету