Пятница, 17 мая 2024

Брава, «малочка»!

436

Думаецца, што каштоўнасць узнагароды, якую ўручыў дырэктару
ААТ «Пружанскі малочны камбінат» Аляксандру Лосю старшыня Пружанскага райвыканкама Міхаіл Грышкевіч падчас адзінага дня інфармавання, не менш значная за тыя дыпломы і медалі, што прадпрыемства атрымлівала па выніках працоўных дасягненняў на ўсіх узроўнях.

Справа ў тым, што ў рэспубліцы ажыццяўляецца прафілактычны праект «Здаровыя гарады і пасёлкі». У рамках яго ў Брэсцкай вобласці праводзіўся конкурс на лепшае фарміраванне сяброўскага дзецям гарадскога асяроддзя. Як абвясціла галоўны санітарны ўрач раёна Кацярына Папко, у конкурсе прымалі ўдзел 36 дзіцячых пляцовак з усіх раёнаў Брэстчыны. У намінацыі «Лепшая дзіцячая гульнявая пляцоўка ў існуючай забудове горада, пасёлка ці аграгарадка» першае месца прысуджана ААТ «Пружанскі малочны камбінат».

Аляксандр Лось прыняў галоўны прыз і дыплом з рук Міхаіла Грышкевіча.

Не сумняваюся, што падобную ўзнагароду прадпрыемства заслужыла па праве: пляцоўка, якая з’явілася ў падарунак дзецям горада напярэдадні 590-га юбілею Пружан, на самай справе, вельмі добрая, займальная і якасная. Яе ацанілі як дзеткі, так і іх бацькі. І мы спадзяёмся, што такімі ці падобнымі пляцоўкамі, створанымі дзеля нашых дзяцей, дзеля будучыні, горад будзе прырастаць пастаянна.

Віктар Ільюшчанка. Фота Кацярыны Масік